थिरिँ बिरिँ 291-337

291 बिलिर फैनाय थरथिँ थरथिँ अखाया गोजोनग्लाय होयो दान्दिसे, बिखायाव माबा सानहाबनाय। 292 मिथिँगानि गुसु बार बिखायाव सानना बिरलाङो गोसोआ गोथौ गोरबो बिखानि। 293 फैलाव दुब्लि नारा गोरान बोथोरनि सानना नायहरो रोमै रोमै मेगनाव दाउसिन बिरथिँङो मोखां बिखायाव। 294 गोसो मोदोम गुसु बिखायाव बोथोरनि बार दिनैनि- बिलिर बिलिर गेलेयो गोरबोआव। 295 मेगन मोखां सिगांआव बिखानि हादिद'ग्ला गेलेदोँ समायना नायहरो फैलाव दुब्लियाव। 296 मेगन गोसो मिथिँगायाव नोजोर गोरबो सानहाबनायाव बिरबायो फैलाव मेगन आंनि दुब्लियाव। 297 गोथां बिलाइ बिफांनि बिरबाय बिरबाय नागिरदोँ- गोमो गोथां समायना मेथाइ खनबाय खनबाय दाउसिना। 298 गोसोखौ बोदोँ मानोबा गोरबोआव लुफावदोँ दोहौ, मिजिँ हाबिला दै निजोरा गोरबो बिखायाव सानस्रि। 299 रंजानाय बिखायाव दोहौ गोदौग्लाबनाय मिजिँ लामायाव थांनाय-फैनाय हां बिखानि। 300 गोगो दैस्लुं अखानि मिनिनाय बिखायाव दान्दिसे, गोजोनो गोरबो बिखाया आंनि; रंजायो मिजिँ लामा गेजेराव। 301 खोलो खोलो बार बिखायाव गोसो बिलिरो सुहाबनाय रंजायो अब्लाबो मेगनाव, फ्लाम फ्लाम मोसानाय बिफां बिलाइनि। 302 दैसानि देहायाव सुहाबनाय रंजायो आं रंजायो गोरबोआव; थरथिँ थरथिँ अखानि बिखायाव। 303 गोसो खाङो समनि गासैबो सावगारिखौ मेगन गोरबोआव नंगुबै महर साया माया, साया माया। 305 बिखानि अराय सानस्रिया दिनै बिरबायदोँ बोदोर रंजानायाव, गोरबोआव बेसेबा आंनि लाजिनाय, मिथिँगाया जंखायो आंखौ; - मोखांआव लाजिनाय मिनिस्लुयै। 306 गंस्रोयो अखाजोँ मेगनाव मोसाना मेँहाबनाय बिफांआ, गोजोनो आंनि गोरबोआ सिं सिं बायदि साननाय बिखायाव। 307 दाउब' गेलेनाय औवा सुबायाव बाफबनाय थिखिनि दालाइयाव, रंजायो रंजायो बिसोर- साजायनाय गावनि महरजोँ मेगनाव। 308 फ्रि फ्रि अखाया आरोबाव गुसु सोलेराव बिलिरो, थोर थोर गोजांनाय मोदोमाव हान्थिनाय आं लामायाव। 309 खोमसि फैनाय मेगनाव सोरगिदिँ जेरैबो खोमसि, - थेनथ'बाय दाउसा मोख्रेबा। 310 आरोबाव आं रंजायो जोमैनि हालि हालि साजायनायखौ नायहरै- लाजिगुसु अखाफोर एब्रेनाय मोखांआव। 311 रैसुमै अनजालिखौ आंनि गोरबोआव साननाय दाखासे, - बारजोँ बिलिर जानाय सोलेरा। 312 हां मोनसे दिनैनि जोनोमा गाबोन आंनि गाबनाय ना रंजानाय? - आरोबाव फैयो गले गले बिखायाव। 313 दं आं मोजांङैनो.... दं, आंनि रंजानाय गाबनाय; दुखु-सुखु जेब्लाबो- सान हर गोरबोआव। 314 ओरैबादि रंजानो आरो जोबोद गाबनो, मिनिनो - सम सम लामायाव; मिजिँनि देरायाव। 315 गोरबोआव बिबान गोग्लैदोँ हेव जायाखै सानसेया, मावनो गोथां जानाय रंजाना बिरबायो गोरबोआव। 316 जिउनि मोनसे आर'जखौ आरोबाव आं फोरमायो खोनासं अबं आंनि- दिनैनि गेवलां मेलाव यज्ञनि मोदोमफ्रु मोदोमनाय गोरबोखौ सुस्रयो आंनि; आर'ज गाबो आं गोथार गोसो साजायना। 317 फुंनि यज्ञखौ जागायो गुसु बारा मोदोमआव बिलिरो दुंब्रुद जोँनाय अरनि सोलेराव गोग्लैयो, गोरबोआ गोजोनग्लायो गोदै गोथाव गन्थंआव मोदोमनाय गोग्लैयो। 318 सिउ सिउ खारनाय मटरनि एब्रेदोँ गुसु बारा बिखायाव, जोँमानि दुंनायजोँ बोहैनाय देहानि गोलोमदै निजोराया दान्दिसे ज्रिँ रानज्रिँदोँ। खारबाय थानाय गाड़िनि सिगां खिरखिजोँ नायहरो गोजान लामाखौ मोखांजोँ। 319 हान्थिना रायदावो गोरबोआ मिजिँ गोथारथिखौ नाजानायाव नागिर नागिर दांग्रोमो। 320 गोबां उसु खुथुआव गोग्लैयो दान्दिसे आं आरोबाव दोबै दोबै गोदोबाय दुखुआव, हाथासि गोरबोआ दान्दिसे, गनायो बे रंजानाया आरो बिरबायो। 321 मेँग्लिनाय मोनो गोरबोआ मानिबा सानस्रि लैथोआव गोदोनानै, सानबाय सानबाय हान्थियो लामायाव गोथौ लैथोनि सानबोलावरिया गोदो हाबो गोदो हाबो। 322 मेलनि जागायनाय जाबाय गोसोआ माबा मुखुब, खोमायाव रिङो बुंथिया गोरबोआ सालियो नांगौ जानाय बोजबो सैथो बोसोन। 323 जोनोमनि सुदेम आयनि गोजोन देरा, सोमखोर फैलाव मिथिँगा आंनि गोरबोआव मुहियो, गोसोआ जोबोद रंजानाय। 324 माबा मोनसे रंजानायजोँ आगान आगान लामाजोँ आवगायो, गोरबोआव आरोबाव- रंजा रंजा मोसायो, जिउनि गोजोना दान्दिसे, उसियो आरोबाव बेवनो हाथासि गोरबोआव सानस्रिया गोजावो। 325 गोरबोआ आंनि बिग्रायखाङो गेदेमानि दुंलुब उदांस्रि सोमावसारनायनि रादाबाव, हब्रायो आंबो रानखांनाय- थेरबुं गारांजोँ; गावनि मोनसे गासोम जानाय, हारिनि उदांस्रि हांख्रायनानै। 326 दान्दिसे समाव आं थियारि गोजोन्नाय गैयै जाबाय समनि- रंजानाय गोरबोआव आंनि मानोबा बाज्ल'यो सिं सिं इसिँ गोरबोआव गोजोनै। 327 लोरबां गोसोजोँ गोबां गोरबोआव लोरबांथि दाखा बिदाय होबाय थेवबो एंगारनो हायै समजोँ गोबा गोबा गोरोबनानै। 328 मेँग्लियो गोसोआ आंनि बुसोम जायो सानफा, आरोबाव गोरबोआव गोदौग्लाबो गोजोन्नाय नागिरो दान्दिसे- गोजोननो आजोरोम। 329 बेयो दावबायनाय नङा गोजोन सावगारि नागिरनायसो- दं आं आगान होनानै आंगो गामि गावनि न' फारसे मोखां जानानै। 330 गोबां गरम गोदौग्लाबनाय जिरि जिरि बोहैयो निजोरा गोजोन्नाय गैया जायो दान्दिसे। 331 खाफालजोँ बोहैयो- गोथार गोगो गोलोमदै दं आं मुखुबथियाव एब्रेनानै। 332 गुदुं गरमाव सोलेरा मेँग्लियो हान्थियो थेवबो लामायाव, बाबेनबाय जोँमा साना आरोबाव हान्थियो लजिँ गोजोन दान्दिसे गोजोनफुरि। 333 सिउ सिउ बारनि मोसानाय आंनि गोरबो सोलेराव बिखाव गोजोनग्लाय सौग्रावो। 334 गोसोनि बोदोर हाबिला मोसाग्लाङो- लामानि गेजेर गेजेर बिरबायो फ्रि फ्रि अखाया मोसायो। 335 रंगिना बिबारफोरा सौग्रावदोँ मेगननि सिगांआव, खोमा बिलाइयाव सिउ सिउ बार सोदोबा सिङाव एब्रेदोँ। 336 समायना- रमायना मा इसे गोरबोआव बोहैग्लाबनाय- गोजोनआ आंखौ फायख्रबो, सफैयो आं गोजोन देरायाव मुहियो जोनोम आंनि गामिया। 337 सानस्रिया दैथिँना बिरबायो बरायना लाबोयो, गोजोन आयनि देरायाव।