De Gledderweeche

Daß Leibzig schdehd in des Vergehres Zeechen, Das siehd mer deidlich an de Gledderweechen, Die jedes Jahr bis Okdower nein In Leibzig an der Dagesordnung sein; Wenn Sie die Ludersch ehrschd zum Vorschein gomm, Denn wer’n mir Leibzger zinfdig hoch genomm, Denn es verfiehrd Sie ludermäß’ge Schdreeche So änne richdge Leibzger Gledderweeche. Wemmer so fehrd, da gehd’s de Weeche nuff Un jeder fast grichd ä geheergen Buff, Un unversehns, da gehds fidel un munder, Mid Schleiniggeed ä gleenen Abhang nunder, Un wenn Sie’s nuff un widder nunder gehd, Bralld aneander, wer de draußen schdehd, Un änne Schbritze an de große Eeche Ersetzd de Fahrd uff enner Gledderweeche. Had eener neies Sauergraud in Magen Un fehrd in so ä ebelebdschen Wagen, Denn hilfd de Fahrd ihn grindlich bein Verdaun; Es zwickd un gullerd egal in Gallaun, Un wenn er bis an de Gasernen fährd, Denn is das liewe Gud so frei un gährd Un schdeigder ab, isser ‘ne halwe Leeche Un alles das verschuld de Gledderweeche. De Schiddelei, die is Sie gans enorm — Wie änne Seefahrd isses bei ä Schdorm, Un wer de so schon wankelmiedig is, Der grichd de Seekrankheed, das is gewiß. Ehrschd meld sich so ä quabbliges Gefiehl Un schließlich machd der Aermste Gotzemiel Un bidded schdumm, daß mer den Arm ihn reeche Un gnurrd derzu: „Verflixde Gledderweeche!“ Erschidderd is sei Underleibssistem Un gommd er ahmds so rechd gedeesche heem, Da schreid de Frau: „Nee awwer, Ferdenand, Du siehst je aus wie ׳ne gegalchde Wand! Hast Aerger de gehabd, verleichd än Zank? Is dersch nich exdra, Männe, biste grank? Unheimlich siehste aus, wie ä Gescheeche!“ Er awwer seifzd: „Das machd de Gledderweeche!“ Fritzchen Mrweessesnich.