's alde Radhaus

Ich gann den Blick nich von dir wenden, Wie lang ich dich ooch angeschaud, Seiddem se dich an allen Enden So hibsch mid Bredern hamm verbaud. Seiddem bis undern Hahnebändern De hechsten Blanken dich umschdehn, Damid, was se derhinder ändern, De braven Bärger nich so sehn. Fern Rad isses je heechst verdrießlich, Wenn unden Gaffer ׳rum sich dreim, Die in der Gosenschdube schließlich Ooch andern den Bedrieb beschreim. Der Gram is ohnehin so deier Un werd noch weidre Blasen ziehn, So is denn hindr ׳ä dichden Schleier Der „Umbau“ bis zum Dorm gedien. Der Dorm — das isses eenzge Gude, Solider Vorzeid letzder Rest! Der Dorm der einfallreifen Bude, Er wenigstens schdehd bombenfest. Zwar, der Balkong gam ooch ins Wanken, Was alle bessern Bärger schmerzd — Mer muß nur seinen Schepfer danken, Daß er nich lange eingeschderzt. Wer weeß, wer weeß, ob nich an Dorme Sich ooch ä innrer Schaden fand? Er hield je ׳n schneeden Zeidenschdorme So viele, viele Jahre Schdand. Un werder bei ä neien Schdärmchen Als dakdfest widder sich bewährn? Ich färchde heemlich, ooch das Därmchen Muß grindlich umgeschusterd wärn. Un fang se ohm an einzureißen De Gubberhauwe scheengebogd, Denn werd — ich färchde’s — sich erweisen, Daß ooch das Middelschdick nischd doogd. Un denn, denn gommd de schwarze Schdunde, Wo ooch der letzde Schdern verblaßd, Weil nämlich, sehn Se, ooch in Grunde Gee Schdeen mehr uffen andern baßd. Fritzchen Mrweessesnich.