ایمان ایله گئتدی
ش شهریار
0
Altın Yaprak
ییغدی خیر و برکت سفره سین احسانیله گیتدی
امن - امانلیق دا یوکون باغلادی ایمانیله گیتدی
بیک - خان اولمازسا دییه ر دیک اولاجاق کندیمیز آباد
او خاراب کندده ولاکن ایله بیک خانیله گیتدی
سیلو دایر اولالی هرنه دگیرمان ییغیشلدی
آمما خالص - تمیز اونلاردا دگیرمانیله گیتدی
مستبد سلطانی سالدوق کی اولا خلقیمیز آزاد
سونرا باخدیق کی آزادلیق دا او سلطانیله گیتدی
بیر بلی قربان اولوب ایندی بیزه مین بلی قربان
آمما خلعت ویرن اول بیر بلی قربانیله گیتدی
دوز مسلمانه دیییردیک قولاغی توکلودی بدبخت
ایندی باخ گؤر کی او دوزلوک ده مسلمانیله گیتدی
ویرمه صابر دیدی او دولما - فسنجانی آخوندا
آغزیمیزدان دا داد اول دولما - فسنجانیله گیتدی
دیدی انسانیمیز آزدیر هامی انسان گرک اولسون
آمما انسانلیقیمیزدا او آز انسانیله گیتدی
بو قدر دفتر و اسناد له بیر حقه چاتان یوخ
حق ویرنلر پیتیگی میزا قلمدان یله گیتدی
بیزه بیر دین قالا بیلمیشدی میراث بیرده بو ایران
دین گیده نده دیدی تک گیتمه رم ایرانیله گیتدی
ایسته دیک قانلا یوواق اؤلکه میزین لکه سین آمما
اؤلکه میز خالص اؤزی لکه اولوب قانیله گیتدی
یورقانی اوغری قاپاندا دیدی ملانصرالدین
نیله سین چیلپاغیدی اوغرو دا یورقانیله گیتدی
هاوا انسانی بوغور باش - باشا گاز کربنیک اولموش
ییل ده اسمیر ایله بیل ییل ده سلیمانیله گیتدی
سو کرج دن کلور ایله گلیر بو پاسلی دمیردن
گؤره سن شاه سوی تک چشمه نه عنوانیله گیتدی
ترکی اولموش قدغن دیوانیمیزدان دا خبر یوخ
شهریارین دیلی ده وای دییه دیوانیله گیتدی
Bu şiiri puanla
Henüz puan verilmemiş