قاصد
ش شهریار
0
Altın Yaprak
سن یاریمین قاصدی سن
ایلن سنه چای دیمیشم
خیالینی گوندریب دیر
بسکی من آخ وای دیمیشم
آخ گیجه لر یاتمامیشام
من سنه لای لای دیمیشم
سن یاتالی من گوزومه
اولدوزلاری سای دیمیشم
هر کس سنه اولدوز دییه
اوزوم سنه آی دیمیشم
سننن سورا حیاته من
شیرین دیسه زای دیمیشم
هر گوزلدن بیر گول آلیب
سن گوزه له پای دیمیشم
سنین گون تک باتماغیوی
آی باتانا تای دیمیشم
ایندی یایا قیش دیییرم
سابق قیشا یای دیمیشم
گاه توییوی یاده سالیب
من دلی نای نای دیمیشم
سونرا گینه یاسه باتیب
آغلاری های های دیمیشم
اتک دولی دریا کیمی
گؤز یاشیما چای دیمیشم
عمره سورن من قره گون
آخ دیمیشم وای دیمیشم
Bu şiiri puanla
Henüz puan verilmemiş