A Boorich O Breets (26 Scots Poems)

S Sheena Blackhall Sheena Blackhall
0 Altın Yaprak
1.YOWE'S LOVE POEM TAE THE RAM Yer een are like the hardest neep Yer powe's as fair's a dyke I love wi virr yer sharny sheen Yer wallydraigle's fyke. Tho fyles I ken upon the Ben Ye are a forcey lover I pray this day that come fit may Ye'll niver be a wether. 2.YOWES ON KNOWES Yowes on knowes an girssy howes, Ging wallopin back an fore, As sune's the year gars aathing brier, Ayont the barn door. Fin aathin growes on braes an boughs, Yowes lowp like kangaroos, Syne woolly mas, wi bleats an baas, Sit doon tae hae a news. 3.CHUDDY Seen frae a car windae, Staunin, dreich an dubby, Jaws gaun back an forrit, back an forrit, A yowe ootside Kirkcaldy. Seen throwe a schule windae, Ootside a heidie's study, Jaws gaun back an forrit, back an forrit, Three lassies chawin chuddy. 4.PAN Beasts o the tree, the burn, the lea, Takk reet in my humanity Fae evenin's derk an dusky mooth The blackie 's tune's a mead fur drooth Come, wheeple on yer pipes, wud Pan An raise the hooded snake in Man Remind him, as returns tae glaur Fin, fur an wing, oor brithers are. 5.GEESE, NEW DEER Geese in Vs flee ower the trees, they dinna like ohs an ahs They scrat their Vs on the slate-gray breeze The skitter o dots are craas! 6.DRAGONS I passed a dragon in the girse, Its een o jade grat siller tears, Bow-hoched it hirpled ben the sheuch, Some-like a boor-tree booed wi years. Each drap that fell fae its great een, Showed holocausts as yet unseen. I drew a grey lance fae its side An watched its mou fill up wi fire, A thoosan craiturs o the nicht, That bedd inbye it did conspire Tae poor fae its wide mawe, coorse seed, The shakkins o its tainted bluid. An yet I cudna raise a sword, Tae hairm it, nur wi bitter wird Condemn the dragon o the wid Nur tell the hunter far it hid. It wis anither fa betrayed The dragon wi the een o jade. 7.THE UNICORN Eence there wis a unicorn, prancin roon a tree Rinnin fae a herd o mares that nummered thirty-three. A student cam an fetched him Tae the university. 'Tell me Mr Unicorn, fit will yer study be? 'Oh I will takk a doctorate in animal husbandry.' 8. SCREECHING GULL (1) The myav is skirlin His beak's a yalla v A wedge o raw sea-soun The myav is skirlin King o the fish-gut kingdom Challengin sea, wave, quay The myav is skirlin A boat wi twa bricht oars Breachin the stormy lift 9.SCREECHIN GULL (2) The diva o the dulse Winnerfu myaav Singin its paeon o joy 10.WEE GLESGA HEN Wee Glesga Hen Sunbathin in ra buff. Belly bared, legs thegither Swytin pirls o fat, 'n that. Wee Glesga hen, turn up the heat. Bit o wine. Bit o patter. Yours, on a platter. Wee Glesga hen, Ken? Wine fur sterters. Turn up ra heat. Wee Glesga hen fur efters. 11.BOWFIN I hid a bowfin puppy dug It piddlit on the mat. An sae ma mither kicked it oot An noo we hae a cat. 12.SKINNYMALINKIE CENTIPEDE Skinnymalinkie centipede hid affa shoogly legs Like a traicle-streak o liquorice on elasticated pegs Bit noo she's swack's a puddock, she can lowp an rax an rin Since Skinnymalinkie centipede's bin veesitin the gym 13.BATHROOM BOGLE Doon at the foon o oor fite bath, Dowpit on echt black legs, A wyver sits wi a smirk on his moo, Wytin tae gie fowk flegs. Turn on the tap! Sweel him awa! Belly, oxter an lug! Ae black wyver on echt black legs Vanishin doon the plug! 14.BAWD BI THE DEE There's a bawd in the park aside the Dee, Far the Tulloch wids hing broon, Fin the birk trees shakk, his lugs preen back, Gainst the win he's hunkered doon. Tho my tales be telt, an my heirskip selt The Dee is an on-gaun story The bawd in the wid wi his fur hauf hid An the beech in its copper glory My fowk an their spikk hae fled like rikk, Nane here noo share my bluid, Yet this snaaflake airt ay claims my hairt I am my faither's seed. Fur an feather an hoof an horn Are fashions that dinna change, An the michty stag on the muckle crag, Is tap o designer range. Tho monarchs crummle an empires cowp, Like wauchts o winnlestrae, The flash o finn ower the tummlin linn Will be there till the eyn o day. Commuter chiels bi the Tulloch puils, Will be stoor an aisse an smush, Bit the troot, the erne, an the wyvin fern Will be here wi the hurlygush. Fin the ile rins oot, an the gushers sproot On Galaxy X or Mars, The bawd'll be bi the dimplin Dee Wi his preen-prick friens, the stars. 15.FIELD MOOSE Bi a mervel, I catch him. Somebody's dippit the moosie's wyme in cream. His hairt's gaun like the clappers, Fit tae breenge fae his briest. Hauf a hanfu, this wud wee moose o the park Is weirin his best broon fur. Daylicht glisters like watter throwe his lugs, Sae thin they'd teir like gauze. His wrunklit snoot gars silky mowser trimmle. Fin I dowp him doon on the yird, Oot o the dizzy element o air, His nyaakit tail wheechs faist, Streaks ben corn that pairts an sweys wi a swish. Field moose is a train On skirps o fleein feet, fower winners o engineerin, Grease-lichtenin taes Mair mervellous than Japan microchips. 16.WILLIE WIRM Willie wirm is tied in knots Because he disna ken If wummlin tap or wummlin tail Is heid or hinneren. 17.HAMISH Nae aa cats are a hive o sedition... Ane can spikk aboot nuclear fission! If ye treated him richt, he wad bide up aa nicht An skaik aboot Chaucer an Titian. This Hamish is shameless an purry Will expose genitalia furry Wi a flick o his tail, he can discourse on Hale An quote fae James Joyce an Charles Murray. 18.PEACOCK AT CULLERLIE On ma passport's stampit 'Clarence', bit ma real name's Gunga Din, I'm an incomer fa cheenged his name attemptin tae fit in, Fur the ethnic composition roon Cullerlie's maistly Scots, There's a cockerel fae Rhynie....there's a bantam fae Loch Potts, There's a goose fae Little Egypt in the pairish o Cromar, Sae the closest tae a pyramid it's bin is Lochnagar. I hae pickit up the lingo. I've a lug fur ither leids. I fyles news tae Prince the stallion aboot fa's won best o breeds I stravaig aboot the midden wi ma tail spread like a fan, I'm the anely Doric spikkin peacock here fae Hindustan. Fyles I weary fur the jungle an the Orient sae braw Bit finiver I growe hameseek, a gweed doonpish cures it aa, Fur a monsoon at Cullerlie gied me aa the weet I crave, Fin a dyeuk gaed sweemin ower a dyke atap a muckle wave! I'm the jewel o the kailyaird, I'm the Sultan o the dubs I'm awa tae clear ma throat oot. Haud ootower or haud yer lugs! 19.TADDIES Shoogle-tailie bandy, skytin ben the reeds Ye hae drag yer shadda in the lang loch weeds Sheetin like a squib ben the lobbie o yer hoosie Shoogle-tailie bandy fit's aa yer stooshie? 20.KIM HIPPOPOTAMUS Kim Hippopotamus stappit her moo, wi chocolate an chips an cheese. She raxxed her jaws an she fullt her wyme, wi puddens an cakes an peas. She fried her tatties, she fried her breid, in a pan o gruesome grease, An efter a year or twa o thon, her belly it reached her knees. She cudna daunce an she cudna sweem, she jist grew fat an fatter, Fin Kim Hippopotamus lowped in a puil, There wis nae room left fur watter. She grew as roon as a gray balloon till she ett her last meringue... Wi a tearsome soon fae her taes tae her croon She blew up wi a bang! 21.WEE LAIRD O THE AIR Falconer's Peregrine, Fyvie Sleek as a Pope's, yer skull cap. A jabot o cream reams ower yer elegant thrapple Ye splay yer wings like a priest in a Haly Chapel Priggin his congregation tae boo their heids in prayer. Wee laird o the air Teirin yer leather tethers, hooded an belled on yer perch, Sune ye'll be taen tae the ring, pit throw yer paces. On yer alloted flicht, rage doon at the upturned faces Fur aathin Man encoonters, he maun cage or snare or control, Fae currency, trade an darg, tae a livin soul. Fowk tae, are taen tae the ring, pit throwe their paces 22. THE FUTTERAT POEM After the 'Mouse' poem by Stephen Parr (The Buddhist poet Ananda) Fair fa yer honest futterat Ower mony futterats spyle the broth Some enchanted futterat Aroon the Warld in echty futterats O my luv is like a reid, reid futterat Irn Bru. Made in Scotland fae futterats Ae futterat in the haun's wirth twa in the buss God save oor gracious futterat Little Miss Muffet sat on a futterat Ilkie good turn deserves a futterat 23. INVOCATION TO THE EGYPTIAN SUN-GOD RA FROM AN AIBERDEEN COONCIL BAKKIE 'Ra! S'caul! Ra! S'caul! A wee auld wifie skirls atween the wheelies It isna caul ava. It's hett's a pysn't plonk 0 a suddenty, oot fae a hotterel o nettles A tortoiseshell eunuch hirples. Rascal, the bakkie voyeur, creepin hame. 24.SPIDER'S WEB: CORNHILL BUS STOP Dingle-dangle spider kickin up a stooshie The dird o passin larries is duntin at yer hoosie Thrummle wyver, thrummle wyver Gin yer shawl sud teir Fa wid hing the dyewdraps The mornin likes tae weir? 25.DEID STAG'S SANG Pairt o the flutterin widlan's pulse, I wis a shuttle in the mist, A throb o fur on cloven hooves, Blae wraith wi een o amethyst. Fower fitted gypsy o the muir, The paths I reenged war roch an fyew, Strung wi fine strands o wyver's lace, Glitterin wi pearlin beads o dyew. Winnerfu as a hatchin egg Spleet new, I bore my kindred's seeds The glamourie o auncient lines, 0 royal sires ran in my bluid. The shiftin contours o my hame, War showdin canopies o fir. Shaddas o larick happed my heid, Far hoolets hunted throw the smirr. My hooves war wings, quicksilver bricht, Breengin ootower the forest fleer, Like meltin steel ahin my back Mist, rippled greyly ower the muir. Mortality my thrapple gript, It catched an felled me like a log. My jaw been's thrang wi moss an steen Smush, in the seepage o the bog. 26.A SABRE TOOTH TIGER REFLECTS Eence aa's said an deen, leid cairries culture, new an fremmit, tho Pipers jam jazz and fiddlers square reel circles. Heedrum hodrum's hip hip hooray in the New Millennium. Nor East balladeers sing sangs wi wolves, wi whales. Scots chiels maun jibber cheek bi jowl At the same brod's Clan Clanjamfray. The oots an ins are cheengin Naebody kens the horseman's wird. E-mails wheech ben the lobby. In the New Millennium, Newmachar commutes. St Machar claws his powe. Staunin steens maun shift their auncient goal posts. Widen their circle. In the New Millennium Tifty's Annie bides wi the trumpeter. Unkent hauns rax forrit The Bishop maun takk an shakk them. Elphinstane's cromack steers the alchemist's brew.

Bu şiire çeviri ekle ·

Bu şiiri puanla

Henüz puan verilmemiş

Yıldıza dokunarak 1–10 arası puan ver

Yorumlar

Yorum yapmak için giriş yapmalısın.

Giriş yap

Bu şiire henüz yorum yapılmamış. İlk sen ol.

Sana daha iyi bir okuma deneyimi sunabilmek için sitemizde çerez kullanıyoruz. Kişisel verilerin KVKK ve GDPR kapsamında işlenir; hangi çerezlere izin verdiğini dilediğin zaman değiştirebilirsin.