Byron's Waddin (Scots)

A jeelin win blew frae the sea The snaa cloud gurly flew Tae County Durham's, Seaham haa A waddin pairty drew This twa days intae Januar The year, echteen fifteen The bride, Sir Milbanke's dother A virgin, fair an clean Young Annabella stude unveiled Snod in a muslin dress Her een war glentin, bricht an blue Her bridegroom tae impress The groom, fite-face an curly powed The lad o her desirin Cam hirplin, gammy-fittit in, George Gordon, sixth Lord Byron At his command, the bridal richts War keepit quaet an quick Her dowry, less than he'd hae liked Luve, thin as caunle-rikk The bride pit on her traivellin claes The coach wis fussled up Far kirk bells pealed an muskets fired George dooned the stirrup cup An first they cam tae Rushyford The groom wis stern an dour The bride sat winnerin, fearie-faced Fit merriege held in store At Halnaby, throw drivin drift Baith lay at last in bed Lord Byron, throw a nichtmare cried ‘I am in Hell! ' he said Daybrakk wis cauld, The groom stepped oot His mainner…jibes an sneers Young Annabella kept inbye Her pilla wat wi tears