Hinkum-Clinkum (30 Scots Poems)

S Sheena Blackhall Sheena Blackhall
0 Altın Yaprak
1.The Wee Cauliflooer I wish I wis a cauliflooer I wadna wash my lugs I'd be as lazy as I liked An blether wi the bugs 2My Wee Sister I hae a wee sister, she burst ma fitba I wish the tooth fairy wid takk her awa She burst ma fitba an she blamed it on me I wish that a monster wad hae her fur tea 3.Mair Greens Please Please gie us greens for denner We think that greens are braw Wi salad for oor brakkfaist An celery tae chaw Let us hae sproots an parsley Kail, piz an rinner beans An dinna skimp on lettuce Us rubbits luv oor greens 4.Flapper the Whale Fin Flapper the whale sets aff for school He wallops his tail an blaws his tap He staps his bag wi crisps an juice An aff he sweems wi a flappety flap 5.Far's Da I like tae watch the boaties An play alang the shore I like tae look fur partens An watch the seagulls soar I like tae bigg sancastles I'm a cheery kinna lad I've jist a teenie problem Far did I beery dad? 6.Spottit Dick The measles cam tae veesit Dick's happit heid tae tail There's five on his bihoochie Nae winner he looks pale He looks jist like a cheetah His skin is fu o spots Bit fin he's really scunnerd He jist jyns up the dots 7.Waiter Fower burgers, fower coffees Some sauce ye can squeeze Here comes the waiter Gies some chips please! An while yer aboot it A dollop o mustard Fower ice creams in cones An a platie o custard 8.The Register Far's Maisie Finlay? Aff wi a hoast Far's Sunita Ranjeev? Chokit on her toast Far's Nimi Munzah? His face is fu o plooks Far's Abdul Sharnam? Paiddlin wi the dyeuks 9.Billy the Scunner Billy's a scunner, he spits an he rages I've seen nicer tigers in zoos an in cages He farts an he rifts, he'll nae dae fit he's telt Bit ye'll hae tae excuse him, for Billy's a shelt 10.Grunny's Pet I'm gaun tae ma grunny the morn She'll caa me her favourite quine I'll hae sweeties faniver I wint them Wi jeely an aathin that's fine Bit I'll jist bide a day an a denner I'd niver laist oot fur a wikk Atween jeelies an cookies an puddens Bi the time I ging hame I'll be seek 11. Ma Brither Ma brither pits wirms in ma bath tub Ma brither pits slugs doon ma back Ae day tae the recyclin centre Ma brither I'd willinly takk An maybe instead o a brither They'd recycle him as a bike I'd dae wheelies on him in the gairden Noo thon is a brither I'd like! 12.Baby Blues I dinna wint a baby. I'd raither hae a ba A tortoise or a ubbit. Dinna hae a baby ma Hae a budgie or a goldfish Baby's makk an affa noise Willy Duthie's got a baby An it pinches aa his toys 13. Neebors The fowk next door keep dugs that gurr A spittin cat wi taiglit fur An auld wrecked car in the backie there An a muckle bogle aneth the stair 14. Mister Minger Mister Minger's got leathery skin A baldie heid an a stibbly chin He etts fajitas an chaws the plate An I think Mister Minger's great 15. Mr Ted Fin I pit on my jammies An climm the stairs tae bed, I ken that he’ll be wytin, My frien caad Mr Ted. An fin I coorie doon tae sleep I haud him in my bosie…. He’s made o fur He disna gurr He’s affa, affa cosie! 16. Doctor Sen fur the doctor My kyte's churnin Sen fur the doctor My chikk's burnin I will takk a mixture Or a great big peel Sen fur the doctor Cause I'm nae weel! His stethoscope is wummly As a big black eel Bit sen fur the doctor Cause I'm nae weel! 17. Dentist Dentist, dentist, My tooth's sweet Will I need a fillin Fin I'm sittin in yer seat? If I pass yer check up I promise that I'll eat An aipple or a tangie Fur a treat, treat, treat. I'll clean ma teeth each evenin Finiver darkness comes Tae stop the germs wi clarty buits Fae dauncin on ma gums! 18. Hoolet Hoolet bides in an auld aik tree, Aathin that moves can hoolet see, His een are sherp an his neb can catch Moosies that move in his leafy patch Rin, rin moosie, he's comin noo Can ye hear him cryin Tu-whit tu-woo? 19. Lollipop A sweetie that's a lollipop's A baa upon a stick. A crossin that's a lollipop Can stop the traffic quick. Sae if there's nae a zebra Or a mannie green an flashin, Look oot fur the lollipop That stops the traffic hashin. An if there's nae a frienly face Far road an pavement meet, Look left, look richt, look left again Afore ye cross the street. 20. Molly Emslie's Dug Molly Emslie's got a dug He keeps her safe fae hairm He sleeps aside her in her bed Tae keep her duvet warm. 21. Neep Halloween! Wee neep in the park, We'll teem yer belly, We'll save yer sark, Pit caunles inno yer twa neep een Fur a ghaistie-licht at Halloween! 22. Octopus An octopus's oxters Are dichtit eence a day He soaps them wi a sea sponge Afore he gings tae play, At fitbaa wi a mermaid A labster an a sole: Bit every kick he catches, They can niver score a goal! 23. Parten First a crannie, Syne a thoomb Snip, snap, snip The parten wytes Aneth a steen Fur tasty taes tae nip. 24. Pincil Leid pincil, leid pincil, makk me a letter Jyne't wi anither an it'll be better, Jyne't wi a puckle an I'll hae a tale As wee as a bandy or as big as a whale. 25. Postie Dunt gings the letterbox My, fit a thrill! I got a letter Mither got a bill. Granny got her pension Granda got a pack Sae aabody got somethin Fae the pyoke on postie's back! 26. Ropies CAA CAA THE ROPIE YER MAA'S AWA TAE THE SHOPPIE TAE BUY A CAKE 0 SOAPIE TAE DICHT YER LITTLE DOCKIE (trad) I hae a ropie, I hae twa Caa the ropie ower an ower Skip up, skip doon an dinna faa Caa the ropie ower an ower. I hae a kite wi a tail sae lang Caa the ropie, ower an ower It daunces up far the birdies gang Caa the ropie, ower an ower. Leave the shute, lowp aff the swings Caa the ropie ower an ower I hae a bike wi a bell that rings! Caa the ropie ower an ower I hae a drum an a tooteroo Caa the ropie, ower an ower An a wee toy bear fae the Embro zoo Caa the ropie ower an ower. I hae a yo yo, I hae a bat Ca the ropie, ower an ower I hae a fussle an a witchie's hat Ca the ropie ow'er an ower 27. Snailie Slivvery, slivvery, bubbly snoot I am the snail fae the watter spoot I cairry ma hoosie upon ma back An draa in ma heid Fin the skies are black. 28. Taxi Driver Taxi driver far's yer fare? Hurlin fowk fae here tae there Taxi driver, if yer late Plane an pilot winna wait! 29. Teacher Teacher's got a fite boord Teacher's got a black boord Teacher's got a stick o chakk Computer an a pen Teacher's got a heidache- Teacher needs a teabreak Davie Buchan's fechtin Jimmy Patterson again! 30. The Coorse Robbers Late last nicht in the Safewyes store Ten coorse robbers creepit in the door The first coorse robber he chored an aipple pie The second coorse robber he chored a tasty fry The third coorse robber he chored a side o ham The fourth coorse robber he chored a leg o lamb The fifth coorse robber tuik fleg an ran awa I phoned the police an they catched them aa!

Bu şiire çeviri ekle ·

Bu şiiri puanla

Henüz puan verilmemiş

Yıldıza dokunarak 1–10 arası puan ver

Yorumlar

Yorum yapmak için giriş yapmalısın.

Giriş yap

Bu şiire henüz yorum yapılmamış. İlk sen ol.

Sana daha iyi bir okuma deneyimi sunabilmek için sitemizde çerez kullanıyoruz. Kişisel verilerin KVKK ve GDPR kapsamında işlenir; hangi çerezlere izin verdiğini dilediğin zaman değiştirebilirsin.