Moon Cakes And Hinney (21 Scots Poems)

S Sheena Blackhall Sheena Blackhall
0 Altın Yaprak
2 1. Gloamin, Siem Reap Motorscooters ferry families hame Unhelmeted human sannies Breid slices stappt wi chillis Cambodia’s a barfit lan o sandals Traffic heezes like boorichs o poorin ants In true reid britherly solidarity A vender peddles by, wechtit wi pyocks an trock Like an upricht cuddy A quine frae a new hotel, swyty in ticht blaik skirt Badge preened tae her sark, Hyters ower the road in sheen an hose The ootlinn in this hett, brunt, humid lan 2. Street Café Nyaakit weers hing fae danglin sockets A muckle scunnersome cockroach Squats in the laavie Ower bumbazed bi heat tae rin for cover The pyjamaad, three toothed waitress Pykes the siller frae a dumfounerment o notes Dunts doon a de-husked coconut, Pierced wi a straa Hanks o phone weers crackle like live spaghetti A rooster craas afore a corner kiosk Like a firey sergeant major on parade On the cassies, a skeleton in rags Heists his haun tae his mou, the global sign o hunger 3. On the Mekong Delta Mangosteen an rambutan Pineapple an durian Mango trees an floatin hames Burns far chocolate watter faems Bird’s nest juice, a sting ray fry Stilt toons on the watterwye Gibbon, langur, rice, catfish Snake’s wine, noodles piled on dish Sampan, bonsai gairden, bees Basket vender on his knees Heich bamboo, green paddy field Monkey brigs an jackfruit yield Lappin waves an bairnies splashin In pagoda, cymbals clashin Jasmine tea an sugar cane Coconut an monsoon rain Weemen rowin staunin up Coolie hats an cheena cup Boats sail by wi peinted een Mahjong, mines, an tropic scene Palm an fig tree, dragonfruit Size zero coos an betel root Mekong Delta, breedin grun Fur floatin merkets, fruits, an fun! 4. Angkor Wat Roon the temple, Agkor Wat Mozzies whine an towrists swat Ilkie guide’s a polyglot In the lan that time forgot A michty fig tree, heichs the sky Drives its muckle reets doonbye Temple waa, a timmer mawe That swallaes stane an statue aa Vive La France! An omelette Wi crossant, suits the Scots palette French rule has left its merk ahin Empires faa, bit cuisines win! Jumbos wechtit doon wi fowk Daunder far the termites howk Towrists, scan the waas tae see Scenes frae hyne aff century Here, a wumman rypes a heid O flechs. A baker’s kneadin breid Here a grumphie’s killt an scoored Thon’s a cauldron. There’s a gourd. Yonner, warships wi their crew Fecht like veggies in a stew Bubblin up or drappin doon Crocodiles crunch shank an croon Fin sodjers faa intae the waves Crocodiles makk fechters’ graves Stane Buddhas in the rooms upbye Contemplate the warld foraye Rowed in silk an incense rikk Furlin frae each scentit stick Angkor Wat aneth the stars Teem o fowk, tuk-tuks an cars Tae the jungle turns its face An the ghaisties o the place 5. Grub’s Up Stir fry crocodile wi spices Puddock in rice parritch, cooked Goat’s prick byled. Fruit drinks wi ices Grilled green draigon, chawed an sooked Bellyfish or snake in bowl Spurgie, ivy juice, steamed snail Teenie squid wi tentacles Scallops grilled wi egg o quail Field moose, lemon, grumphie’s stammache Sauted bluid clams. Lychees, sweet Raivellt noodles, shrimps an dumplins Weasel grilled, wi nuts tae eat Byled deer’s tendon, lotus juice Fruits o jungle, rare an bricht Sic a rowth o unca ferlies Nae a plate o broth in sicht! 6. Sky Fowk ower Cambodia Sky fowk gyang traivellin in comfort an style Airm rests an doon-raxxin seats mile efter mile Road fowk maun warssle like sprats in a tin Crammed inno buses that Wint squashes in Sky fowk lie dwaumin. Air hostesses say ‘Maet tae refresh ye? Roast chucken the day.’ Road fowks’ repasts are flee-pepperet an swyty Sappy, an fooshty, an tasteless, an clarty Sky fowk drink aften, wi laavies nearby Wee, bit wi soap an clean tools on supply Road fowk are drouthy…nae watery, nae sink The bus winna stop, sae they’re aa feart tae drink Sky fowk, oh sky fowk, tell’s, fit dae ye ken O the thoosans o traivellers wi little tae spen? Sky fowk, oh sky fowk, pray ye dinna faa Siller decides fa wauks big, fa wauks smaa. 7. Ninetieth Daithday Pool. Peopl e plop! Cool. Lowped inno the muckle puil o seelence Edwin Morgan, jynin the ither sax, MacCaig, Maclean, MacDiarmid Crichton Smith, Mackay Brown, Robert Garioch Raxxin the ripples o their influence oot A Glesga chiel, drawn tae matters o intellect Champion o ootlinns. Giein prejudice the auld hee-haw Thon braid grin wad hae meltit a hairt o granite The gleg een keekin pawky oot ahin his glaisses A linguist, scholar, gaun-aboot body Fa gaed voice tae sic disparate craiturs as The Loch Ness Monster, Marilyn Monroe, A blin man ettlin tae pee Rousseau's bogle, Auld Clootie at Auschwitz Mao's kittlin an Glesga Gangs Luv-makkin on the Cathkin Braes In the bield o trees an buss in the gloamin licht He gart us ken ken that luv’s the gowd, Fariver it’s bestowed. Sweet dreams, sweet makar Fa keepit yer audience warm in the hap o yer haun Widenin oor harns tae the weird, the wud, the winnerfu 8. Conga Fever I am watchin the blootered attemptin the Conga Ane’s jigglin her thong an ane’s scrattin his donga Like dervishes dauncin tae pipe skirl or bonga Ilkie Jack Jacques and Juan’s like a native o Tonga There’s Callum frae Crieff like a wild anaconda There’s Doris as wizzent’s King Tut or Jane Fonda There’s Wilhelm as stiff as a cut an shut Honda The veesions ye see fin yer watchin the conga! The shooglin o Rhys, a toon clerk frae the Rhonda Nae haein tae wark tae some tickin sekonda He hopes tae impress a fit waitress caad Wanda He’ll burst his bihoochie fin dauncin the conga It’s hetter than Hades, Mount Etna, Rwanda Foo can they still daunce? It’s a mystery tae ponda Arooon an aroon like a furlin rotunda Like eels on amphetamines, daein the conga 9. The Warld’s Warst Cabaret Act Foo much dae they pye a pro act tae sing flat? Dae they pye him in sweeties, or haun roon the hat? I’ve heard sweeter notes fae a fricasseed cat Foo much dae they pye a pro act tae sing flat? Fin he dees, will he gyang tae a bum steer’s corral? He’s cringfu as dichtin yer a...s wi Izal Bring on the lugplugs, the fricasseed cat A hyena wi croup could sing better than that! 10. 4 Confabs heard on a bus The Punk Spikks Oot Ye dinna mynd me sittin doon aside ye? I dinna like the back seats on the bus Dinna be feart at ma piercins an tattooes Its jist the fashion, ken? We’re nae aa tarred wi the same brush. Yer grandother’s anither ane comin? Ye dinna luik auld eneuch. I like tae see the auld fowk getting oot It makks them smell better, the fresh air. Back Speirin Far is gley-eed Jimmy noo? He bedd at Dubby-Dykes His uncle ained a smiddy an sortit roosty bikes Ye ken the lad I’m meanin..a richt chiel fur a spree Ye’ve niver heard o Jimmy? Waur...Ye’ve niver heard o ME? I Niver Thocht I niver thocht I’d see the day fin fish war fand in fingers I niver thocht I’d see the day fin burgers were humdingers I niver thocht I’d see the day fin girse come cut like rugs I niver thocht I’d see the day fowk cleaned up eftir dugs The Daith Announcement Ay ay, fit like? Nae bad conseederin Foo’s the man? Rheumaticks sair? Fair tae middlin. Foo’s yer ma...a cheerie wife? The richt side o the sod Foo’s yer da? He’s unner it. Oh my God! 11. Tryst This is a Scots owerset o a poem bi an anonymous seventh-century Japanee I telt them I wis wytin tae see the risin meen Abune the heich Ben’s showder. It wis a lee I’d gien As I wis wytin lanesome for the true licht o ma een. 12. The Bawd An Owerset in Scots o ‘The Hare’ frae the Carmina Gadelica. Alexander Carmichael. Faiver reads ma testimonial, I wis wioot doot vertuous, Wioot wae or serveelity In ma natur. I wadna ett roch girse, The maet fur ma wame Wis the gran herbs O the muirs. Ma cap, tho it be reid-like, Wis lued bi leddies, An ma hoch, tho cauld, Bi lairds. It’s a dowie tale tae tell That I am this nicht streekt oot An that ma harns-pan Is bein rypit, efter they had strippit ma coatie Richt doon tae ma paas, An birssled ma corp On the lowe. I wisna in this state Ower the Mertinmas sizzen Lowpin an caperin Mangst the roch knowes. Withoot thocht at thon time That the vratch wad cam Wi his gun tae catch me In the gloamin. I wis at hame on the heath Far ma faither an forebears War kittlesome, blythe An virr-fu; chawin the blades o girse On roondit braes an muirs, Tho I fell inno the snare That wis ma doonfaa. Scots Owersetts o 3 Poems an ae Nippick o Prose bi Georg Trakl(1887-1914) frae Inglis translations bi James Wright & Robert Bly 13. The Rattens In the fermyaird the fite meen o autumn sheens. Eildritch shaddas drap frae the eaves o the reef. A seelence is bidin in the teem windaes; Noo frae it the rattens creep oot saftly An skitter here an there, skreichin, An a blae dowie mist frae the pish-hoose Follaes ahin them, snifflin: Ben the mist the ghaistly meenlicht chitters. An the rattens skirl wi virr as if gypit An gyang oot tae stap hooses an barns Which are reamin fu o fruit an grain. Jeelin wins argy in the derk 14. On the Weety Lea A chiel fa stravaigs in the blaik win; the dry reeds reeshle quate-like Ben the seelence o the weety lea. In the blae lift A waa-gaun o wud birds meeve in ranks Aboot-birlin ower derk watters. Stramash. In the doon-faain hooses Foosht is flichterin oot wi blaik wings; Bladdit birks breath wechty in the win. Gloamin in teem road hooses. The langin fur hame sattles aboot The delicate grue o the grazin flocks, Veesion o the nicht: taeds breenge frae siller watters. 15. De Profundis It is a stibble park, far a blaik rain’s faain. It is a broon tree, that stauns alane. It is a hissing win, that rings aroon teem hooses. Foo waesome the gloamin is. A fylie eftir, The saft orphan gaithers the fyew nippicks o corn. Her een luik, roun an gowden, in the gloamin An her wyme awytes the heivenly bridegroom. On the wye hame The shepherd fand the sweet corp Dwinin in a buss o thorns. I am a shadda far frae derkenin clachans. I drank the seelence of God Oot o the burn in the trees. Cauld metal wauks on ma broo. Wyvers hunt for ma hairt. It is a licht that gyangs oot in ma moo. At nicht, I fand masel on a lea, Happit wi rubbish an the stoor o starnies. In a hazel thicket Angels o crystal rang oot aince mair. Three Owersetts o poems bi Johannes Bobrowski (1917-65) 16. Deid Leid Pruzzian was used by the German writer Johannes Bobrowski. The italicised words are among the remaining fragments of that tongue in this Scots owerset of an English translation He wi the beatin wings ootbye fa swypes agin the yett, thon is yer brither, ye hear him. Laurio he says, watter, ablow, tint o colour, deep. He cam doon wi the burn, driftin aroon buckie an snailie, spreid like a fan on the san, an wis green. Warne he says an wittan, the craa has nae tree, I hae the pouer tae kiss ye, I bide in yer lug. Tell him ye dinna wint tae listen – he cams, an otter, he cams heezin like hornets, he skreichs, a girselowper, he growes wi the muir aneth yer house, he fuspers in the wallie, smordis ye hear, yer blaik alder will dwine, an dee at the palin the morn. 17. Dryad Owersett frae an Inglis trans. bi Ruth an Matthew Mead Birk, cweel Wi sap, tree, yer braith In ma hauns, stinch Bark, a yieldin glaiss Bit tae fin deeper Steerins, the streetchin in the trunk raxxin tae the branches let yer hair faa faa on yer nape, I hear throwe the cweelness, I hear a flichterin hear the current heist the risin flood hear ecstasy sing in ma lug 18. The Soun o Watter biggs Nests inno the Feathered Seelence Ma lift Mixter-maxters wi yours Sae dis ma doo Noo it flees ower yours I see twa shaddas Faain In the park o corn We luik wi Each ithers een We finn a neuk Rain We say Like a story The hauf Green sentence I hear Yer moo Wi the spik O birds Cairries twigs an feathers Up tae ma broo Owerset in Scots of an English translation by Robin Fulton of a poem by Olav H. Hauge from ‘Leaf Huts & Snow Houses’ 19. I Chapped Doon the Muckle Aipple Tree (frae Olav H. Hauge) I chapped doon the muckle aipple tree bi the windae It connached the ootluik, fur ae thing. The parlour wis dreich aa simmer Mairower, the traders Didna wint thon kyne o aipple I thocht o fit ma faither Wad hae said, he likit Thon aipple tree Bit yet I chapped it doon. There’s a rowth mair licht. I can see ower the fjord Or keep an ee on Mair neebors The hoose is noo in full View, shows Mair o itsel. I dinna wint tae admit it Bit I miss thon aipple tree Things arena the same. He gaed a gweed bield An gweed shade The sun keeked Throwe his branches Ontae the table, an at nicht I aften lay, lippenin Tae the airy leaves, An the aipples- Nane finer in spring Wi their spicey taste It’s sair ilkie time I see the stump. Fin it saftens I’ll chap it intae kinnlin 20. Scotland Lives: OK? After The Physical Impossibility of Death in the Mind of Someone Living An installation by Damien Hirst Pickled in the formaldehyde of forever, Mary Queen of Scots continues to reign Along my synaptic clefts Memory's a rowan tree of myths Neuro-transmitters cradle Flodden’s angst The thistle, crushed and bleeding, a mighty army, crows meat. The hemispheres of my mind Track Allt na Giubhsaich, A broken dyke, the cry of whaup and banshee I am hard-wired to the history of a nation The prism of music, lighting its every crannie Its leafy glens flooding my mind’s receptors Time ferments the loch of lineage Deepens the self’s connections Each moment the soft rain of language Rises up from legend, The hynie-back, the eildritch, the un-deid This charts my life, a backdrop of belonging The gritty roar of the city, The hush of the North Sea’s incam 21. Hong Kong frae the Air Hong Kong, the fragrant herbour, Is noo Chinee, ower far doonbye tae notice Drappin doon tae Chep Lap Lok airport, Ower Lantau islan, bi Discovery Bay The Trappist an Po Lin monasteries Luik like chalk sticks unner a lan o cloud Muckle plumes an corries o air Glimmer at ee-level, heicher than hawks Ablow, the lego o skyscrapers Are dwarfed bi the michty Heivens

Bu şiire çeviri ekle ·

Bu şiiri puanla

Henüz puan verilmemiş

Yıldıza dokunarak 1–10 arası puan ver

Yorumlar

Yorum yapmak için giriş yapmalısın.

Giriş yap

Bu şiire henüz yorum yapılmamış. İlk sen ol.

Sana daha iyi bir okuma deneyimi sunabilmek için sitemizde çerez kullanıyoruz. Kişisel verilerin KVKK ve GDPR kapsamında işlenir; hangi çerezlere izin verdiğini dilediğin zaman değiştirebilirsin.