Scots Poems From Mind Spaghetti

The Deid are Bletherin A fermer uncle at Yule, has feastit us in his hame Oor stammachs raxxed, he blethers aboot Corn an kye. His lowe roars up the lum A widdaed aunt, her skin nut broon's a tinkler Sits alane in her hoose. Her budgie reests On her cheer back, wheeplin birdie-spikk Ma fowk hae telt me o forbears, rapes an infanticides In days afore the chemist shop doled oot Bairn-stoppers like sweeties The reets o the past bred drooths an singers A clachan poet, fermers, the antrin sodjers Marched aff tae daith in the glaur o Flanders Fields I steek ma een an I sit bi Lake Ontario. Danglin ma feet aff a pier, newsin Wi a hauf brither, stepped intae the derk ower sune Somewye I hae drapped ma family like a crystal bowl Splintered into shards. Glentin up frae the smush Ae son luiks up. I canna lippen tae him Fearin the truith will drag its blade ben ma breist Aiberdeen as an ice cream cone The sweetness has dreepit doon tae the fit o the cone The Dee, the Don, the shakkins o the Denburn Abune thon, a kirn o granite biggins Statues, spires, kirks, skyscrapers, schules Tappit wi dauds o clouds, wi sprinkles o rain An a stick o rock frae Rubislaw Tae brakk yer teeth on. Fit is it like tae be a cat? Fit is it like tae be a cat? Tae chaa yer wye throw a bird or moose Tae clean yer dowp wi yer wee pink tongue Tae hog the hairth in yer chusen hoose Fit is it like tae be a cat? Tae raik unstoppit, tae please yersel Tae catch yer prey even tho ye weir Yer maister'sgiftie a daft wee bell Fit is it like tae be a cat? Tae merk yer territory oot wi pee An gin a trespassin moggie cams Tae cleuk an scrat at its snoot an ee Sir Thomas Sean Connery (25 August 1930 - 31 October 2020 The last o the dare-deil Hollywid breed Superstar Scot on the siller screen Sir Tam Sean Connery is deid His parents struggled their bairns tae feed A blythe bairnhood, tho his pooch wis teem The spy fa's smeddum wis guaranteed Aywis prood o his Scottish bluid Stuntman, lifeguaird, sic jobs he'd taen Coffin polishin, earned his breid At fitbaa Connery did exceed Sax fit twa in his stockin sheen Set up a Trust fur Scots in need Ikon o cinema, fowk tuik heed Larger than life, on adrenaline Sir Tam Sean Connery is deid 4 Doric Owersetts o poems bi Li Ch'ing Chao (1084-1151) Li Ch'ing Chao(also known as Li Cingzhao or Li Qingzhao)lived at the time of the Song dynasty. Her family were "scholar-officials". The Sun Sets in Meltit Gowd bi Li Ching Chao The sun sets in meltit gowd. The evenin clouds makk a jade disk. Far is he? Thick fite haar haps the sauchs. A dowie flute plays "Faain Plum Flooers." Foo mony Spring days are left noo? This Feast o Lichts should be blythe. The weather is calm an bonnie. Bit fa can tell if it Will be follaed bi win an rain? Sorra o Departure bi Li Ching Chao Reid lotus incense dwines on The jewelled curtain. Autumn Cams again. Douce I lowse Ma silk dress an float alane On the orchid boatie. Fa can Takk a letter ayont the clouds? Anely the wud geese cam back An screive their picturs On the lift unner the full Mune that floods the West Chaumer. Flooers, as is their wye, flichter An skitter. Watter efter Its natur, fin skailt last Gaithers again in ae airt. Craiturs o the same species Lang fur each ither. Bit we Are hyne apairt an I hae Grown kennin in sorra. Naethin can makk it dwine An gae awa. Ae meenit, It is on ma eebroos. The neist, it weys on ma hairt A Frien Sens Her Perfumed Cairriage bi Li Ching Chao A frien sens her perfumed cairriage An heich-bred shelts tae fetch me. I turn doon the invite o Ma auld poetry an wine fier I mynd the blythe days in the tint capital. We tuik ouo ease in the wumman's quarters. The Feast o Lichts wis brawly celebrated - Fauldit necklets, emerant hairpreens, lace girdles, New sashes - we competit Tae see fa wis maist smert riggit oot. Noo I'm dwinin awa, Win-blawn hair, fite hair. I'd raither bide ahin the curtains, An lippen tae spikk an lauchter I can nae langer share. He Is Gane bi Li Ching Chao Win stoppit, the stoor is scentit Wi the drappit flooers. Tho day is weirin late, I'm ower trauchelt Tae takk tent o ma hair. Maitters bide the same, yet he's here nae mair, An aa is feenished. I lang tae spikk, bit tears faa first. They say that at the Twin Burns Spring is still braw. I wint tae row a boatie thonner. Bit I am feart that the wee boatie On the Twin Burns Couldnaethole the wechty load o ma wae 3 Doric owersetts o Poemsbi Bai Juyi:(772-846) Bai Juyi (also Bo Juyi or Po Chü-i; Chinese) , courtesy name Letian (Chinese) , was a renowned Chinese poet and Tang dynasty government official.... He achieved fame as a writer of verse in a low-key, near vernacular style that was popular throughout China, in Korea and Japan. Nicht Snaa: Bai Juyi I wis bumbazed that ma quilt an bowster wir cauld, I see that noo the windae's bricht again. Deep in the nicht, I ken the snaa is thick, Whyles I hear the soun as bamboo snaps Camin Hame Late on Pingquan Road in Yuletide- Bai Juyi The Ben road is hard gaun, noo the daylicht dwines In a reeky clachan craas reest on cranreuch trees Nivver myne that I dinna makk it bi nichtfaa Three hett cups an I'll feel at hame Girse- Bai Juyi Frae year tae year, the wizzent girse In aa its glory briers upon on the plain Wud lowes burn bit dinnae trauchle us Spring win blaws, an aince mair aa is green A hyne aff perfume traivels the auncient road An like a bricht emerant jynes the city waa Dear frien, aince again ye are awa An the braw girse is fu o fareweel Li Yu (Chinese c.937- 15 August 978) , was the third ruler of the Southern Tangstate. He reigned from 961 until 976, when he was captured by the invadingSong dynasty armies which annexed his kingdom. He died by poison on orders ofEmperor Taizong of Song after 2 years as an exiled prisoner. Doric Owersetts o 4poems bi LiYu A Heivenly Woman's Jyled in the Palace A heivenly wumman's jyled in the palace at Penglai Knowe, Aa are seelent as she sleeps bi day in the peintit haa. Her sheeny hair is spreid like cloud on the bowster, Her embroidered claes weir a winnerfu perfume. In secret I cam an draw the pearl snib back, She's stertled frae her dwaum ahin the siller screen. Her smilin face is reamin ower wi blytheness We luik at each ither wi eynless luve. Foo Mony Tears? Foo mony tears rin ower yer chikks, rin ben yer face! Dinna ettle tae spikk fin worry makks ye greet, Nur play the flute fin it will bring yer tears, Or sure eneuch, syne yer hairt will brakk. Licht Haar Rowes up the Blearie Mune Licht haar rowes the blearie mune an bricht flooers, A perfeck nicht tae gae tae her dearie's side. In stockin soles, she treids the perfumed steps, An cairries in ae haun her gowd threided sheen. They tryst bi the sooth side o the peintit haa, An trimmlin faa intae each ither's arims. "It's hard fur me tae creep oot like a skiffy, Tae teach ma dearie the daftness o luve." The Win Cams Back: Ma Wee Coortyaird is Green an Owergrown The win cams back; ma wee coortyaird is green an owergrown, The sauchs seem tae hae briered again this spring. I lean fur a lang time on the railins; alane, wioot a wird, The soun o bamboo an the new mune are jist like in days gane by. The playin an singin hinna yet stoppit; the wine cups bide, The ice on tap o the puil sterts tae thaw. Bricht caunles an a feint perfume are deep in the peintit haa, It's hard tae think I maun lat ma hair turn fite.