Scots Poems From Why Give Nuts To A Man With No Teeth?

S Sheena Blackhall Sheena Blackhall
0 Altın Yaprak
Tae be Yersels Dinna weigh yer guests eftir Xmas Denner Ditch the Scottish cringe Ett a deep fried pizza Weir elastic waistit claes Fart frae the side o yer bum chikks Use irn bru as a mixer Peel unfranked stamps frae yer mail Takk up nyakkit tennis Pit macaroni intae a pie Powk yer plookson the bus Roll yer rs wi pride Raise the flag fur mealie puddens Pye fur yer granny's neist tattoo Leave yer jobbies floatin Takk yer wallies oot tae sook strippit baas Ping yer bogies at the dug Share the guff frae yer oxters in the Gay Gordons Gie Tunnocks tea cakes for a waddin present An maist ava, spikk oot lood an prood Wi nae a slice o pan loaf in yer mou! For Fiona Soe Paing Generations back her forebear wis A Nor East balladeer fa sat on a corn kist Weirin his tackety buits She is dowpit on a streamlined seat Nae guff o sharn or ferm aboot her She's genteel, clivver, chic Her chords hae a niche mairket Somelike his cornkisters in the nooadays Ahin her, a muckle photie o Forvie sans Far a hale clachan lies beeriet She plays eildritch souns Like a hauf smore coronach fur the deid Filterin up frae yestreen Halloween Ghaisties 2019 The Duke o Cumberland rattles ooto Provost Skene's hoose Bumbazed bi the muckle glaiss kist that stauns afore it Robert the Bruce admires his spankin brand new statue ‘Peety they've turned ma huntin wid intae a gowf coorse' Charles II wis pleased tae see clubs stappit wi laptop dauncers He wis dumfounert that fowk wir pickin up dug keech Aa his palaces wur kent as canine lavvies A puckle witches, wizzent an birsslit Hirple doon frae the Braid hill luikin sizzlit Mediaeval orra luikin mochs Fit a stammygaster tae meet the modern guizers A heeze o makk-on zombies, ghouls an Goths! Stanley Superman The Superman o storytellers Stanley zoomed atween Aiberdeen an the States Ae day guttin in the fish hoose Tither, in a varsity ower the Atlantic At hame in baith Maister o aa his warlds Channelin angels Singin in a barber shop choir Fortune tellin, storytellin Ghaist huntin. Ballad singin Wis there naethin this man cudnae dae? A family man, a Morman He'd the memory o Methuselah Generous tae a faut Ye've heard o the Satt o the Earth? Stanley wis the satt! The Globe Birls A dominie's nails scrat doon the boord The globe birls The globe birls A sodjer's corp whumps on the bluidied san The globe birls The globe birls A flooer skreichs in a burst-ooterie The globe birls The globe birls A shaman maens an auncient healin tune The globe birls The globe birls A wee quine's feetikins pammer The globe birls The globe birls Tick tock gaes the bomb on the tube The globe birls The globe birls Sophokles brakks an ashet. A Greek waddin The globe birls The globe birls The Gweedman's Gairden The gweedman's gairden is a soss It's fu o weeds an taigles Bit aa the craiturs bidin there Hae aa escaped frae fables They like the gairden cause it's wud An secret like thirsels Alang wi nettles, dockens, thrissles Hurcheons an harebells Lochnagarx I ken a cat caad Lochnagar Fa hauntit like howf an bar Fin bleezin fu he liked tae frolic He deed a ragin alcoholic Poppy Reid Poppy reid, poppy reid Myndin, murnin on the deid On Jamie etten slaw bi cancer Faither, hairt attack in sleep Ma, a stroke in her nichtgoun Wi MND, daith cams in a creep On Benjy, kidneys crashed an foonert On Jenny, killt clean bi a smash On Charlotte-Rose…life niver stertit On Dean, o'd on skunk an hash On Barbara fa MS connached On Ellie deed fin giein birth On Sandy fas lungs stoppit wirkin He veesits aa, his nemme is Daith Untalented Peints, foo they rippit ma sowel Rinnin like sair greets Drappin in jeeled watter Masks A wolf gurrs ahin't The mask I am weirin Makks me luik human Feetikins Ah feetikins, feetikins Ma tears cudnae save Langsyne in the grave French beret Here's a French beret The Auld Alliance myndin Oor deid Queen Marie Yuletide x Argy-bargy Pass the tangie Bubbly jock Santie sock Xmas pies Thunder thighs Diets foonert Faithers blootert Mistletoe Caunle glow Holly berry Tom n' Jerry Robin's cheeps Champit neeps Brussel sproots Figs an fruits Muckle dram Biled ham Film repeats Girnin geats Sair belly Roon the telly Trains on strike On yer bike Pairty hats Fechts in flats Xmas trees Pipes that freeze Pantomime Cracker, rhyme Wauk the mutt Aathin's shut! In the Green Kirkyaird ye lie In the green kirkyaird ye lie In the rain an snaa an sleet I shall murn till seas rin dry Till I've nae mair tears tae greet Sic a bonnie bairn ye war Ay the warld gaes birlin roon Berry een an raven hair Daith, the vratch, dings aa men doon Swickit ooto bairnhood's joy Ay the warld gaes birlin roon Ye war reared fur derker ploys Daith, the vratch, dings aa men doon Sair I mull ower auld mistaks Ay the warld gaes birlin roon Coffin kists bring coorse hairt brakks Daith, the vratch, dings aa men doon Craw Taes Craw taes, craw taes, cowped the English shelts Craw taes, craw taes, gaed English riders welts Craw taes, craw taes, dinged prood Edward doon Craw taes, craw taes, saved King Robert's croon The Gift that keeps on Giein The gift that keeps on giein, ma granmither's spikk Poored inno ma lugs fin I wis knee heich tae a chunty Ma faither an mither spakk it, ilkie uncle an aunty Claikit in Doric…the wirds ran aboot the hoose Like littlins, blethered aroon the ingle I heard them in ilkie sang, poem, story an jingle Oot in ma kinsmen's parks, thon braw wirds Named ma warld…kye, shelts, yowes, dyeuks Lear nae gotten in buiks..Byre an sharn an corn Steadins an cottar hooses far birns o bairns wir born At Halloween we scoored the hoose till gleamin At Hogmanay the drams wir fulled tae reamin Yule wis a tangie powked at the fit o a sock An auld hen wi skirlie stappit up its dock I hae hoardit the wirdslike a hairst Tho ithers hae dane it better Doric, close as a hairt beat in poem an letter Imagine a shelt at a ferm show Scots as a cuddy. Ile its hooves richt weel Ithers may cock a snoot,gie oor leid the hee haw Lat them. We ken it's braw. Caimb oot its taigles It's steppin oot wi rosettes an sheenin braisse Step forrit Doric, bow tae the kintra's press An at the forefront mynd an pit the young Fur they are the future champions o the Mither Tongue 3 poems bi Ryokan owersett in Scots 1. Early simmer- floatin doon a caller rinnin burn in a timmer boat A bonnie quine doucely plays wi a crammosie lotusflooer Held in her fite hauns The day growes mair an mair skinklin Young cheils play alang the shore A shelt rins bi the sauchs Watchin quaet, spikkin tae naebody The bonnie quine disnae shaw that her hairt is brukken 2. Waukin alang a nerra path at the fit o a Ben I cam tae an auncient kirkyaird stappit wi countless heidstanes An thoosan year auld aiks an pines The day is eyndin wi a lanely maenin win The nemmes on the stanes are aathegither dwined Even their kinsmen canna mynd fa they war Smored bi greetin, nae able tae spikk I takk ma cromack an gyang hame 3.Late at night, lippenin tae the winter rain Myndin on ma youth Wis it anely a dwaum? Wis I really young aince? A Hymn tae Yalla Van Gogh's sunflooers on a clinic waa A daud obutter new churned ooto milk The pyson dreepin frae an aidder's fangs The reid an yalla dragon, Chinese silk A daisy's face wi petals aa aroon A starnie glentin in the derk meenlicht The yalla ochre on a peinter's brush A yalla yeitie coories ooto sicht A Wee Souvenir Is it a moose? Is it a rat? Wi a wheech o the tail It is Padme the cat! Cheengin herself intae sherp cleukit claws Huntin the birdies in reid hips an hawes Is it a moose? Is it a rat? Wi a wheech o the tail It is Padme the cat! Beinn an t-sidhean, Strathyre Dae ye like the nemme men gie ye? Mebbe ye'd rather be caad Boaty McBoatface? Priscilla or Erchie or Shuggie? I hope ye dinna mind me glowerin at ye We hinna even bin introduced It's nae as if ye can shift Fin fowk invade yer space Dinna be feart. I'm far ower auld tae sclimm ye I dinna ken foo ye can thole These wintry mornins wioot a sark or semmit Caledonian Antisyzygy Callander Heard steppin ooto a car ‘Thanks fur the hurl, hen See ye next wikkeyn' A smile, a wink The car drives aff His hale luik cheenges…'F.... witch' He gurrs, fulls his mou wi a gob Spits it ontae a bonnie peony rose A richt bampot A maist ungrateful scunner She maun be desperate, ken Tae takk up wi a midden amang men Daith takks the Bonnie Robin Daith takks the bonnie robin Hetakks the Heids o State An spit o ony priggin, He'll takk ye sune, or late The corbie in the cornpark The leddy in her haa The singer, the celebrity He wheechs them aa awa Daith takks the bonnie robin Hetakks the Heids o State An spit o ony priggin, He'll takk ye sune, or late Embro tree spikks oot A wee bird telt me Some trees in the kintra Growe fariver they please Whit widd Embro be like If we aa tried thon gemme? Traffic in a snorrel Leaves aawey Scaffies' vans nae able tae lift the rubbish Nae natural, is it? An the same bird telt me Naebody iver trims their branches either They maun luik like A richt bunch o tossers in a gale Like thon Europeans That niver shave their oxters Us Embro trees We're cut fur the minimal luik Like a Mondrian peintin in timmer Ae wee daud o greenery On oor croon…the ultimate Zen Oor trunks are fur wee dugs tae pee on An poets tae screive aneth Withoot gettin etten bimidgies Civilised, ye ken? I've even heard there's places in this warld taen ower bi trees miles an miles o them Thon's fit I caa anarchy Thon's widlan sprawl Overpopulation spreids disease Naebody's gaun tae elbow ME Aff Princes Street.Ye can keep yer kintra copse Nae bluidy stag's gaunt tae teir the bark aff MY back Landseer or nae Landseer Ma place is in the toon aside the park Loch Builig The lang greet o a whaup abune the muir The bizz o a wechtit hinneybee in simmer A pudduck parpin deep amang the seggs Ten thoosan years o clouds an heath an watter Nor east culture ye ken Nae bosyin or clartin kisses on strangers Nae oxterin up fowk like tv presenters A nod o the heid. ‘Mphm' or ‘Aye' we say The wye we say it spikks volumes Nor East Culture, ye ken Renamin Deeside Cauld comfort howe The pammerin puil The dyeuk heidit linn The tippeny dooker The hudderie muir The breengin Burnie The Ben o the erne's wings Lang Sandy's pathie The glen o the whigmaleeries The stammygaster cliffs The eildritch fiddler's knowe There was a young man from Strathyre There was a young man frae Strathyre Fa luiked like his heid wis on fire He'd near scoored it raw, fin he happened tae faa In a boorich o sharn in the byre

Bu şiire çeviri ekle ·

Bu şiiri puanla

Henüz puan verilmemiş

Yıldıza dokunarak 1–10 arası puan ver

Yorumlar

Yorum yapmak için giriş yapmalısın.

Giriş yap

Bu şiire henüz yorum yapılmamış. İlk sen ol.

Sana daha iyi bir okuma deneyimi sunabilmek için sitemizde çerez kullanıyoruz. Kişisel verilerin KVKK ve GDPR kapsamında işlenir; hangi çerezlere izin verdiğini dilediğin zaman değiştirebilirsin.