The Tower O Babel: Many Scots Owersetts From World Poets

S Sheena Blackhall Sheena Blackhall
0 Altın Yaprak
Twa owersettins o Friedrich Holderlin (1770-1843) fae English Translations bi Denise Riley Mids o Life (Halfte des Lebens) Wi yalla pears An rowth o wud fite rose, Lan hings ower the loch. Luv-kinnlit swans steep heids In deep cweel watter. Far noo, fin Yule wins roon Will flooers be fand? Will sun an shiftin shadda clad the yird? Waas staun, clean tint o wird, Soonless an caal. The win gars weathercocks Gyang rick-ma-tick. Ilkie Day (Wohl geh' ich taglich) Ilkie day, a different path I takk, Up tae the tinklin burnie or the wid. Whyles tae the steens far steerie roses growe I sclimm the weary knowe...bit aye ye're hid. Far I keek oot upon the blinnin licht, Ma bonnie bird, ma wirds takk sudden flicht Inno teem air...I ken oor claik wis richt. Yer hyne awa. Sair, o yer couthie face An soons o steerin life, I feel the wint. Far are the liltin sangs that brocht me peace? I hae grown auld, an aa lan's grace is tint. Farweel, fur ilkie day ma gangrel thocht Gyangs oot tae ye, grows wae, is turned awa. My een luik langin efter aa that's gaen, Straicht throw intae yer nerra shilpit staa. Owersettins o contemporary poetry frae the Laigh Kintras, frae English translations bi Hugo Brems an Ad Zuiderent. Gloamin (Anton Van Wilderode: Evenin) The rikk o tattie-shaws hings wersh roon ferms That lie ayont the twinin maze, lang lanes Tint in the meenlicht an the mochy haar. The teams o horse an herdsmen sikk their hames, A hint o milk an iron's in the staas, Even the kitchie yoams o hey an curds, A noisy ritual that's tint o wirds, Is celebrated as the gloamin faas. Throw bleary smirr o tears, the windaes leam. Ahin them, kitchie wummles, tho still seen Aa sup, till ilkie ashet's fairly clean. Cockerels an shelt makk haste tae sleep an dream Screivins (Remco Campert: Letters) I should screive tae this ane an thon that I'm hale an hairty, That I wis fu last nicht in a Greek howf, A Turkish howf...a Norwegian howf... That I'm grittin ma teeth fur a byordnar heich gas bill An ither ferlies tae ithers- Dauchlin in a warld that growes mair fey Far somebody said: 'Ye Dutch, yer aa the same.' Even tho I'd pyed the cheque, an wis weirin a pair o French glaisses, An fit's mair hid a buik o German poetry in ma pooch, An at hame on the table wis Anne Sexton's grand poem 'Wytin tae dee'... An takk tent o foo I pit in new fuses! 0 a suddenty the licht gaed on again, An she wis sprauchled, sleepin on the sofa, aneth the blue blanket. I should screive tae this ane an thon ane: That I winna dee't. That I refuse. That I'm takkin it tae coort... That the days here weir awa like rain. That the warld is niver bigger than ae toon...That the warld's the size o masel in thon ae toon, Ma feet on the cassies, an fit I see fin I blink ma een. An I should speir foo things are gaun. Whether or no the hoose is biggit. Whether or no the play's weel translatit. If the bairns are thrivin, an the wives nae ower doon-hairted! Twal early Japanee Haiku (Gochiku et al) translated inno English in 'The Way of Zen' bi- Alan Watts In the derk wids Weety sna doondra A berry draps Faddomless. Limitless The soon o watter Laneliness The reiver left it ahin A timmer yett The meen at the windae an fur a sneck Yon snail Dreichness o Winter In the rain watter tub The soun o the scoorin Spurgies are lowpin 0 the saucepan Mells wi the puddocks' skreichs Leaves drappin The mist hides itsel Happin een anither In the girse The rain dreeps on the rain 0 depairtin Autumn The lang nicht A drappit flooer The soon o watter Gyaun back tae bough Spikks ma thocht Twis a butterflee! The starnies on the puil Wi the gloamin win The winter shooeries The watter laps Rochle the watter Agin the heron's shanks Three owersettins o Zen Poems bi Ryokan, frae English translations bi John Stevens 1. Dyewdrap Life is a dyewdrap Transient, teem. Foo faist aa things maun crine! My years are gane Trimmlin an dweeble Noo, I tae maun dwine. 2.Thochts Siller fite, the snaa enfaulds the Bens. Far frae the clachan, my yett's smored in thick weeds Midnicht. A daud o timmer's spittin on the fire I am an auld bodach, fite an taiglit is my beard My thochts are ay-returnin tae ma bairnhood. 3.Eencemair Eencemair, mony greedy fowk are thrang, Nae different frae silkwirms wippit in cocoons Gear an siller are aa they lue. Their hauns an bodies dinna devaul ae meenit, Ilkie year their natur's blichtit waur Their bigsie notions growe. Ae foreneen daith comes chappin They've spent bit hauf their siller. Ithers win the hinneypot. The deid man's name is tint Fur sic as thon, there can be anely peety, The wae o waste ahint. A Scots owersettin o a poem bi the Polish poet, Laura Pawlikowska, translatit inno English bi Tom Pearce. A Byordnar Bonnie Dream Yestreen I hid, fur a cheenge, the bonniest dream ye iver cud imagine! There's niver been its marra. Aboot sweemin in the air as if in watter. The fowk inside the dream ken naethin aboot its ongauns, They're vauntie aboot their progress, their wyceness, Their haud o the laws o gravity. I'm dowpit doon amang them, suppin blaik coffee. We news aboot scunnerin ferlies, Praise tae the Heivens some God-awfa wummin... 0 a suddenty, I caa ower ma platie an piece. I lowp ontae the table-heid, Pit baith hauns thegither as if I'm prayin An skyte clean ooto the open windae. In the lift that's pure as a dolphin's dookers, or a diamond I hear a grue raxxin up tae greet me frae aneth, Somebody skirlin, the deil has catched me awa, inno the air. A dowie boorich o fowk meeve ben the cassies. They're burnin incense, lichtin caunles. I see their physogs...as Fite as paper sheets, Sae farrer, farrer, farrer, aff I sail. I haive aside great drumlie dauds o win, like it wis waves, I lauch ma heid aff at the glekit pairish. They hae hard hairts, are beeried tae the neb in bigsieness Naebody's maistered this airt except masel. Aabody's takkin tent. Aabody's luikin up at me, bit nane o them can flee! I reist on the tree taps. I makk-on I'm a cherub in the lift, Tho a polisman cries tae me frae aneth. I sweem, I float, in the maist modern o wyes. I sigh wi ma young breistie fu o virr I dicht awa the birdies frae my broo. At gloamin time, I traivel hame on fit, I sit at hame aneth a gowden licht bulb Makkin on that naethin fey or unca'd iver happened. Aabody's sittin, maist doon-pitten In an ill-teen. Nae ane will spikk tae me. They anely dicht their glaisses, Hodge, an hoast. Owersetts frae English translations' bi Stanislaw Baranczak & Clark Cavanagh, o modern Polish poetry Speirin fur Faith: Bi Jan Twadowski I'm chappin at Heiven.I'm speirin fur Faith. Bit nae yon hauf-hung tee believin That coonts the starnies, disna see the chukkens. Nae yon flee-bi-nicht variety, Thon speeirtual category that bides a day an a denner. Yon's nae the faith fur me. The Faith I wint is fresh as peint, Nae killt bi priests an seannachies. The Faith I wint'll follae its ma like a lammie, A Faith tae fox the harns, that ye'll intuit. That pykes the wee-est wird, . Nae lang langamachies. I wint a Faith that canna answer aa, That disna come adrift wi Daith's doonfaa Thon's the Faith I wint. A Faith nae easy tint. The War o Nerves: Bi Artur Miedzyrzecki Nerves quanter nerves. A natural ferlie. Tykes wurr at kittlins. Broon bears gurr at bees. The pine moch frichts the widsman. Buikwirms deave buiksellers. Boa an skunk chase mappies ben the trees. Saft spikk is less than eeseless. Dwaums aboot gyaun on leave are gran bit pyntless. (Dis the muckle erne swallae a fly cup Fin hunsmen frae copters sheet his airwyes up?) The nichtingale sings on, throw cataclysms. The erne rules the lift. Come ilkie spring, Widpecker, skyrie drummer, raps his mornin rhythms, The swippert swalla flees, swifts flaff their wings. In the war o nerves, the winner's mind, in Zen's, The ane fa disna luik fur skaith. Fa kens A skunk is ay a skunk. Unshakkable truth Keeps ay a straucht furr. A calm sooch. An owersett o a poem bi Zbigniew Herbert translatit inno English frae the Polish bi John an Bogdana Carpenter. Tae Tryst Ferlies Ooto their Queenly Quateness Tae tryst ferlies ooto their queenly quateness, Ye maun be sleekit or coorse. The jeeled lochan o a door Is brukken bi the knell o a boozer. A quaich drapped on the timmer fleer, Gies a sherp skreich like a glaiss bird. A hoose that's bin set in a lowe Gibbers wi the lowpin leid o flame, Wi the leid o a braithless Celtic bard Aboot fit the bed, the kist, the curtains, Said feint the wird. An owersettin o a poem bi Chief Seathl, an Indian o New Mexico, land in English in 'Yellowstone Country' bi Richard Phillips. Ilkie Pikk o this Yird Ilkie pikk o this yird is hallowed bi ma fowk. Ilkie brae, ilkie glen, ilkie howe, an wid His bin sained bi some ferlie Blythe or dowie, in the deidlangsyne. The verra stoor ye staun on Gies mair luv tae oor fitsteps nor yers, Fur it reams wi the bluid o oor kin. Barfit, we feel thon sibness. Even littlins fa bedd an rejoiced here A shortsome whylie, Still lue these derk lanely airts An at gloamin they tryst wi The shaddowy shades o the deid. Fin the Reid Man's worn awa, An the memory o ma tribe Is anely a Fite Man's myth, These shores will heeze Wi the speerits o as my clan! An fin yer bairns' bairnies think thirsels alane, In the park, the store, the shop, alang the road, Or in the quaet o the pathless wids, They winna be thir lane. At nicht, fin the streets o yer toons An clachans are quaet, an ye think them teem They will steer wi returnin ghaists That langsyne filled an lue this bonnie lan. An owersettin o 'Our Fathers Had Powerful Songs' bi Natalia Belting, New Mexican Indian. Oor faithers hid pouerfu sangs Oor faithers hid pouerfu sangs. At the Crack o Time, fin they scattered tae merk oot hames, They sang, an the lan they stood on wis theirs. Nae ither body ained it, the sang made it theirs. They sang fur watter. Oot it poored in springs. It flowed doon burns, gaithered in lochs an puils. They sang, an their sang vrocht the months, the years, the Sizzens. They sang, an their sangs made Daunce. Oor faithers hid pouerfu sangs. We hear them yet, their fitfas an their drumbeats Fin we lie doon, lugs lippenin tae the yird. An Owersettin in Scots o 'The Delight Song of Tsoai-Talee' frae 'The Gourd Dancer' bi N. Scott Momaday, Kiowa. The Delight Song of Tsoai-Talee I am a feather in the bricht lift, I am the blue shelt rinnin alang the parks, I am the fish, rowes glimmerin in the watter, I am the shadda steekt tae a bairnie's fit, I am the gloamin, skinklin in the lea, I am an erne, playin alang the win, I'm a bricht boorich o beads I am the star that is hynest awa ava. I am the cauld o dawn, I am the roar o rain, I am the gleam in the tapmaist sheen o sna, I am the tracks meen lays alang the loch, I am a fower-colouret flame, I am a blate deer, stude in the deein day, I am a park o flouer an aipple, I am a V o geese in the Winter lift I am a young wolf's hunger, I am the dream and the sum o aa these ferlies. Ye see, I am leevin, am leevin, I am sib tae the Yird, I am sib tae the Gods, I am sib tae aa that's bonnie, I am sib tae the dother o Tsen-tainte. Ye see, I am leevin, am leevin! Three owersettins frae 'Native American Songs & Poems' translatit inno English bi Brian Swann Aybydan Braith (bi John Smelcer (Cherokee/ Ahtna) Ootbye ma shielin windae I hear the corbie's hauf-smored skreich rise frae the burn. A licht burns laich on ma tableheid The air in the quaet o the chaumer disna steer I think aft times o thon nicht In yer caravan at Nikiski 0 the tales ye telt langsyne Dena' Ma Suk' dua 'Thon that's screived on the tongues o fowk.' As a bairn ye war skelped wi a stick Fur spikkin yer ain leid. Ma faither, born at Indian River Disna ken his ain mither's leid. The nicht, Kenaitze Indians foregaither At a Russian orthodox kirk Tae murn in cheenged wirds Mangst fite-washed crosses An roosty siller ikons. As I raxx inno the derk It is yer voice that lifts Corbies' wings abeen the burnie's banks His auncient wirds Rise like a yalla tide. Skins as Auld Testament bi Carter Revard (Osage) I winner fa first slippit in Tae makk eese o anither craitur's skin Tae bide hett Like a bluidy rape, a heresy near Tae crawl inno the deer's Still-stounin presence yonner Tae takk their lives o fit hid meeved inbye Tae ett its tasty intimmers Syne spreid its likeness ower Thon sleepin an pechin body Musk-happit inbye the win, the rain, the on-ding Tae coorie doon in a seal-skin sel aneth a walrus Heiven The sna wid dunt an chap at.. Tae feel baith feet growe hett even on ice or sna. Sic a body maun hae thocht the lowe frae a caunle Wis like thon warmth frae fur an hide It maun hae bin some kinno bumbazement Fin the life stouned back inno jeeled haun or fit Efter the fur happit its nyakitness Even mair fin the human bodies Birzin in the bear's derk fur Fan the Winter's warmth An syne its bairn inbye the wummin Sprang alive. Ptarmigan (An owersett o an Inuit Poem) A wee ptarmigan dowpit doon In the mids o a muir On the tap o a snaadrift. Its eelids war reid, Its back wis straikit broon. An richt aneth tail feathers braw an fine Wis dowpit doon the bonniest bihoochie! Sang o the Open Road Owersett frae the poem bi Ogden Nash: 'Song of the Open Road.' I'm thinkin that I winna see A billboord, bonnie as a tree. Mebbe, unless the billboords faa I winna see a tree ava I like ma body (fin it's neist tae yers) Owersett frae the poem bi e.e.cummings, I like my body when it is with yours I like my body fin it's Neist tae yers. It's near new-biggit Muscles swacker an harns mair stinch. I like yer body. I like fit it dis I like foo it hings thegither. I like tae fin its rig-bane An the trimmlin smeeth snodness that I will Ower an ower an ower Kiss. I like kissin thon an this o ye I like slawly straikin the bumbazement o yer pelt Yer birze-the finger fuzz, an fit-dye' caat cams Ower yieldin flesh..an een, like muckle love-crumbs An mebbe jist like the fey begeck 0 unner me yersel, unca new-farrant Dauchlin i Wids on a Snawy Gloamin owersettin o Robert Frost's 'Stopping by Woods on a Snowy Evening' Fa ains the wids I think I ken The clachan hauds his but an ben He winna spy me dauchlin here Watchin the snaaflakes stap his glen My shelt maun think it unca queer Tae staun wioot a fermtoun near Tween icy loch an widlans black The derkest gloamin o the year The sheltie gies his reyns a shakk Tae speir gin there's bin some mistakk The anely ither soun's the wheep 0 drappin sna an win sae swack Deep are the wids an derk their sheen Bit there are pledges I hae gien An miles afore I steek ma een An miles afore I steek ma een. The Road I didna takk owersettin from The Road not taken' bi Robert Frost Twa roads forkt aff fae a yalla wid Sair I sikkit tae traivel baith A gyangin fit yet bide I did Glowert doon ane as far as I cwid Tae far it booed in the girsy swathe Syne tuik the tither as jist as braa An likely haein the better claim As it wis girssy, nae worn ava Tho as for thon, feet braid an sma Hid trod the baith o them near the same An baith thon foreneen equally lay In leaves nae step hid trampit black I keepit the first fur anither day Yet kennin foo wyes gang aft agley Dooted that ever I wad cam back I shall be tellin o this wi a sigh Ages syne as an auld grey beard Twa roads forkt in a wid an I I tuik the ane that less gyang by Yon wis the choice that cheenged ma weird. Owersettins o Slovene lyrics translatit bi Janko Lavrin & Anton Slodnjak et al The Sang o a Boozin Cronie: Janez Menart Because o her reid lips, we twa Supped reid liqueur till like tae faa. Because o her een, broon an bricht, We supped broon rum frae morn till nicht. Because o her derk, curly powe, The derk wine set us baith alowe, An fin my frien began tae dauchle, I slawly raise up, like tae sprauchle. Because o her feet, sweet an sma, I brakk twa bottles on the waa. Gweed kens foo much, I drank till fu, The dawn raise up an brocht tae view Twa drukken hoolets feelin fine, Skimpit o siller, stappt wi wine. An fin anither day wis deen, We gaed on boozin like yestreen. Drambuies drooned fur three midnichts, Fur three hale days, fur three hale nichts, Oh, sair we tried tae lair thon quine Bit failed tae droon her wi the wine. A Sang: Josip Murn-Aleksandrov Hyne in the misty heicht, The evenin starnie's licht, The evenin starnie's licht, Wi tints o yallas, bricht. Alang the quaet lea, The siller burnie rowes, The siller burnie rowes, Inno the nicht's derk boughs. Inbye the hairt o man, Sae monie wishes dawe, Like starnies, bricht oweraa. Like burnies–slipt awa. Myndin on Granda: Tone Payeek The stoor, noo, differs neen.We cam back cheenged, Turn up like towrist bodies, An watch the barley swey throw careless een. Tell me, auld bodach, Granfaither, heich as Truth, Far are yer shelts? An far's yer youth? Yer marts, yer loon, yer neebors an yer wife, Fecund's the yird sae broon? Langsyne, langsyne, the clock let faa its wechts, An booed its heid. Weirin yer fairmer's beets, yer muckle bunnet, Ye sclimm the knowe aleen, Quittin the kirkyaird, sclim the braes o hame, Teet at the sun, luik langsome ower the glen. The barley's ripe. Ye watch, an ye are blythe. Aroon ye on the knowe, yer friens resume their lives, Claik, noo the craps are ripe 0 prices, taxes, wives, 0 hairsts an wine, An whyles, o yer deid laddie. Yer bluid revives. The barn trimmles wi pleisur, Soun o the daunce. This meisur Gars the verra corn daunce tae the beat, 0 yer deid feet, 0 yer deid feet, 0 yer deid feet. The Tummler: Kajetan Kovic The nicht's the hinmaist show O the great tummler. Roon the arena, Fowks' throats brakk inno cheers. He differs frae the lave, The grey automata. He stauns, a skyrie lowe. A skitter o steely applause, Shooers ower his powe. The ban strikks up. An frae ahin the scenes, A wattergaw lowps heelstergowdie oot. Green jooglers, Pinkie dalls, Bobbies in blue, Fite jumbos breengin forrit, Fey warld far fancies sproot. Teem echoes dirl wi The dowie merch o Destiny. The tummler boos an boos, Staunin, lane an heich, Deid centre o fowks' een. Fowk clap-clap in their ranks, Wytin the gran finale, The hinmaist birl O his skyrie-clooted shanks. The nicht's his hinmaist oor. Drink in his colours, Drink in his bluid, Strippit an deid, He'll faa doon in the stoor. The Lochan. Oton Zupancic The daily oors that slip alang the lift, Show in the watter's keekin glaiss, syne shift. Aa dawns drap in the waves their gowden trail. Aa starnies on the lochan screive their tale. Like mony truths, they're pictured ane an aa, The Ben, the knowe, the steeple, island sma, Birdie an cloud that wanner Heiven's wyes. Frae oot the deep aa ferlies doubled rise. The loch brings coontless glories tae oor een, Shaws licht an shade, the michty sun an meen, An as we watch these picturs, they step in Inbye oorsels, syne vanish like the win. Forge me on yer Anvil: Oton Zupancic Forge me on yer anvil, life, Gin I'm flint, a spirk I'll makk. Gin I'm steel, syne I shall sing. Gin I'm glaiss, syne I shall brakk. The Fairmer Spikks tae the ScholaroAlojz Gradnik Aneth, I finn the solid grun, An coontless starnies see owerheid. Foo dae ye show tae me insteid Abysses anely...derk, profun? Far div ye staun? I've aften thocht, Yer bit a spider in a neuk. Ae breeze...ae roch win's reivin cleuk, An as yer spinnin's gaen fur nocht. I lue the yird, the starns that flame An glimmer ben the skinklin nicht, An haein faith, I ken nae fricht, Fin on the road that takks me hame. I'm weel acquant wi Yule, wi Spring, I ken that Time will on me turn, Bit fin I cross the dowie burn Daith will uplift me, on his wing. Owersettin o a poem bi Mihai Ursachi. Translatit inno English frae the Rumanian bi Don Eulert & Cornelia Hincu Narcissus Nabbit Bit the watter didna bide still. Its waves cam in aboot Fin cried on, sae it seemed, Frae nichts withoot tap nor boddom, Foun nor faddomin. Frae caves, tae be A keekin glaiss tae his physog. Foregaithered, the watter Wis, fur a meenit, his marra, Loaded tae the gunnels wi Narcissus In ilkie drap. Bit the watter didna bide still. It drappit doon, ilkie skirp Weirin a smatterin o his luiks. The hale puil wis Narcissus. Syne, drappin, iver drappin, It swalled inno a burn. It swalled inno a michty river. Till in the muckle ocean His icon's swallaed like satt. In yon glen, aside the puil, A flock o flooeries grew Because the watter didna bide still. Owersettins o poems bi C.P.Cavafy, translatit inno English bi John Mavrogordato 1.The Pictur Ma darg is in ma hairt an in ma harns, Bit latchy composition dings me doon. This day's bin a sair trauchle...it's soor face Is iver derkenin, rain an win blaa roon. My wish is jist tae luik an makk nae soon. Yonner's the draain that I spy eenoo, Here bi the spring, I see a bonnie loon A weel-faured chiel, gowd sunlicht on his broo. He's sprauchled oot. Nae doot he his bin rinnin. Noon haps him roon, in sleep an joy he's sunnin. Dowped doon I luik fur lang. An in sic wyes, Efter ma darg, Art rests me, an repyes. 2.Ae Nicht The back wynd cud be watched ower frae the windae. Nerra, in clart an sottar it wis lairt. Hidden abeen it, in an ill-famed howf, The chaumer wis a puir, doon-merket airt, While in the boozer doon ablow, some chiels Played cairds, blythe-like, an newsed awa weel-sairt. Upon the chaumer's hummil, orra bed, I preed the flesh o luv, I preed the moo, The roosed an randy rosy lips o wine, Reidened wi sic a vine that even noo, Tho mony years hae passed, as I screive here Inbye ma lanesome hame, again I'm foo. Langins Like bonnie kistit corpses ne'er grown auld, Rose at their heids, an jasmin at their feet, Decked oot wi floories, nailed doon wi a greet, Langins are like thon...langins that bide cauld, An niver satisfeed, swicked o ae nicht 0 pleisur sweet, ae glimpse o mornin bricht. Caunles Days o the Future rax afore oor een, Like raws o lichtit caunles, gowden, stoot, While streeked ahin, the deid days o yestreen, Are dowie stumps o caunles snibbit oot. The nearer caunle reets are rikkin yet, Cauld, meltit, booed, each waxen makk is marred, I dinna daur teet roon, sae I'll forget That I, wi their infirmities, am tarred. I dinna wint tae turn aroon an see The horror o the line that grows sae quick. Foo seen the derkenin caunles multiplee Bricht lowes pit oot, each een a blaikened wick! The Toun Quo ye, 'I'll traivel tae the Muckle Furth, Ben furreign seawyes, ower the fremmit Earth. S ome better toon I'll fand awa frae here, Far guilt bladds aa ma ploys. It's turned me sweir Tae bide far my hairt's fooshionless an sterk, My harns are hinnert, aa my thochts are derk. Fariver I step oot an heist ma een, Blaik larachs o ma life rise up abeen. This toun that's spyled mair years nor I cud name, I aim tae quit, tae sikk a better hame.' 'Ye'll fin nae better airt in fremmit toun. This toon will dog yer trailin fit, ma loon. Ye'll reenge aboot in streets the same as these, Grow jist a fite aneth the selfsame trees. Anither toun wad bring as little cheer, Untae a chiel sae cankered an sae sweir. Tae leave yersel ahin, nae road's bin bigged, Nor ony ship, nae maitter fu weel-rigged. Naebody spyled yer future bit yersel, Nae bonnie tune, faas frae a crackit bell. Twa owersettins o Greek poems frae English itia, islations bi Elena Fourtini Krinio Bi Rita Boumi Pappas. The poems tells o the daith o a 19 year auld Greek resistance fechter in word war 2, foundit on fit she telt the poet's man, Nikos Pappas, fa wis the quine's defence arttorney afore she wis shot. Aim straicht at ma hairt. It's served me weel this lang. I've even shood a corbie-colored cloot Atween ma briests, deid centre. I've niver heard afore, a gunshot bang. Peer young sodjers, waukened wi the dawn Fur this derk duty. I've niver held a gun masel, ye see. An sae this execution at daybrakk Will be a new experience fur me. I see yer een gap wide... It's nae yer wyte Ye itch tae finn ma femininity Afore ye fire the shot. I unnerstaun I winner fit bynames fowk gie tae ye? Fa kens, we micht hae played Street games as bairns. Quick, dee yer wark, Spare me the foreneen's frost I'm nearly nyakkit, Dress me wi yer fire. Smile, Let yer luiks enfauld it at the last, This body niver happit bi a luver Nae even in the riggin o a dream Quine that a young bride's joy Will ne'er discover This Present pits The Future in the Past Pairtin: Eleni Fourtini, Sparta, Greece I rowed ma een In a saft cloot. I faulded them awa. They winna luik on ye again Nane o the twa. Ma twa reid lips I beeriet in the mire An noo it's anely Watter they desire Ma feet sae swift Noo amangst moosewabs lie Yer yett's a thoosan mile An mair, ootbye. My airms, I happit Deep inno the sna They winna haud ye back My luv, ava. Bit oh, I sud hae sterted wi ma hairt Fur wersh, wersh war its wounds The beatin hairt That stouns and stouns an stouns. Owersettins o three extracts frae 'Fruit Gathering' bi Rabindranath Tagore, India Far roads are vrocht I lose ma wye In the wide watter, the blue sky There is nae line o a track The pathwye's happit bi birdies' wings Bi the starfires. Bi the flooers o the gyaunaboot Sizzens An I speir my hairt gin its bluid cairries the wyceness 0 the unseen wye. I waukened an fand his letter in the mornin I dinna ken fit it's aboot, fur I canna read I'll leave the clivver chiel alane wi his buiks I winna tribble him Fur fa kens gin he can read fit the letter says? Let me haud it tae ma broo, an fauld it tae ma hairt Fin the nicht growes quaet an the starnies ane bi ane skinkle I'll spreid it on ma lap an bide quaet The reeshlin leaves will read it oot tae me The sweeshin burn will chant it An the seeven wyce starnies Will sing it tae me frae the lift I feel that as the starnies glimmer inbye me The warld brakks inno ma life like a flood The flooers brier in ma wyme Aa that's bairn-like o lan an watter Rikks like incense in ma briest An the braith o aathin Plays on ma thochts Like a flute Short Puja: owerset frae the Friends of the Western Buddhist Order Buik o Buddhist Devotional Texts, English translations a auncient Pali an Sanskrit Stertin Reverence We venerate the Buddha, The Ane o Perfect Enlichtenment, The Guide tae the Wye. We venerate the Dhartita, The Lear o the Buddha, That leads frae pit-mirk tae licht. We venerate the Sangha, The Buddha-sib, That shaws the wye An fills wi admiration. Reverence tae the three jewels We venerate the Buddha, An wad sikk tae follae him. The Buddha wis born as we war born. Fit the Buddha dinged doon Oor ainsels can ding doon We venerate the Dharma, An wad seek tae follae it, Wi body, spikk an thocht, until the eyn. The Truith in aa its aspects, The path wi aa its roadies, We sikk tae larn, practise, syne tae ken. We venerate the Sangha, An wad sikk tae follae it. The sib-ness o the fowk fa wauk the wye As ain bi ain we makk oor ain committment An iver-raxxin ring, the Sangha growes. Gifties tae the Buddha Reverencin the Buddha we gie flooers, Flooers at brak o day, caller an sweet brierin Flooers that the morn are dwined an deein Oor bodies tae, like flooers will weir awa. Reverencin the Buddha we gie caunles Tae him fa is the Licht, the gift o licht His muckle Lowe lichts a sma lowe inbye us The lamp o Bodhi gliminrin in oor hairts. Reverencin the Buddha We gie incense Incense fa's sweet perfume wauchts throwe the air Sweeter than incense, is the perfect life Spreidin in ilkie airt throwe-oot the warld. Dedication Ceremony We dedicate this airt tae the Three Jewels, Tae Buddha, the Marra o Enlichtenment Whit we aa sikk tae gain Tae the Dharma, the pathwye o the Lear Whit we aa sikk tae follae Tae the Sangha, the growin Buddha-clan That we can aa enjoy. Here, may nae menseless wird be spukken Here may nae unquate thocht steer up oor harns. Takkin tent o the Five Precepts We dedicate this airt Tae the darg o meditation We dedicate this airt Tae the growth o wyceness, we dedicate this airt Tae the winnin o Enlichtenment, we dedicate this airt. Tho in the warld ootbye there's collieshangie, Inbye may there be peace Tho in the warld ootbye there's great ill-will Inbye may there be luv. Tho in the warld ootbye, there's dule an wae, lnbye may there be blythness. Nae bi the chantin o the halie Screivins Nae bi the spirkin o halie watter Bit bi oor ain smeddum wirkin tae Enlichtenment We dedicate this airt. Aroon this Mandala, this halie circle May the lotus-petals o purity brier Aroon this mandala, this halie cercle May the vajra-waa o virr raxx far an farrer Aroon this Mandala, this halie cercle May the lowe tae cheenge Samsara tae Nirvana Kinnle an rise. Dowpit doon, here practisin May oor thocht becam Buddha May oor thocht becam Dharma May oor spikk amangst aa fowk Be Buddha-sib. Fur the blytheness o aa craiturs Fur the guid o aa craiturs Wi body, spikk an thocht We dedicate this airt. Blissins May aa blissins be yours May aa the gods takk tent o ye Bi the pouer o aa the Buddhas May aa blytheness be yer ain. May aa blissins be yours May aa the gods protect ye Bi the pouer o aa the Dharmas May aa blytheness be yours May aa blissins be yours May aa the gods takk tent o ye Bi the pouer o aa the Sangha. May aa blytheness be yer ain Verses tae Proteck the Truith Nae tae dae ill, Tae ettle tae dae guid Tae purifee the thocht Thon is the lear o the Buddhas. Lead a richteous life Nae ain that is orra The richteous live blythely Baith in this warld an the neist. He isna acquant wi Dhamma Fa gibbers like a gowk. He fa hears a nippick o the lear Bit kens the Truith, an acts on't Is truly caad a chiel weel versed in Dhamma Nae ither bield bit Buddha Bield abeen aa, will dae me. Ay, bi the venue o this truith May grace growe grait, an victory Nae ither bield bit Truith Bield abeen aa, will dae me. Ay, bi the vertue o this truith May grace growe grait, an victory. Nae ither bield bit Sangha Bield abeen aa, will dae me. Ay, bi the vertue o this truith May grace growe grait, an victory. Aa praise tae the Buddha Aa praise tae the Dhamma Aa praise tae the Sangha Sadhu Sadhu Sadhu The Hairt Sutra Bodhisattva o Compassion, whaun his thochts sank deep inbye Kent the teemness o aa five skandhas An caad tae Crockanation the chynes o skaith. Takk tent, syne, form is nocht bit teemness, teemness nocht bit form. Feelin, thocht an wylin, Kennin itsel, are the same as thon. Aa ferlies are primal teemness that isna born or killt Nur is it spylt nur pure, nur dis it growe nur crine. Sae in teemness, nae form. Nae feelin, thocht or wylin, Nur is there ony kennin.Nae ee, lug, neb, core, harns Nae hue, soun, guff, taste, touch, Or whit the harns takk baud o, nur even act o sensin. Nae ignorance nur eyn tilt, nur aa that briers frae ignorance Nae dwinin an nae Daith. Nae eyn o them. Nur is there pain, or cause o pain, or stoppit pain, or Noble Wye Tae win frae pain. nae even wyceness tae attain. Attainment tae, is teemness. Sae ken that the Bodhisattva, haudin tae naethin ava Bit bidin in Prajna wyceness, is lowsed frae delusive snorls Lowsed frae the fear they breed, an wins tae pure Nirvana. Aa Buddhas Noo an Afore, Buddhas o Times tae cam, Makkin eese o this Prajna wyceness, cam tae a full clear veesion Takk tent o the great dharani, the Mantra o aa Mantras The Prajnaparamita wha's wirds takk the stoon frae pain. Takk tent an ken its Truith! Gate gate paragate. Parasamgate bodhi svaha

Bu şiire çeviri ekle ·

Bu şiiri puanla

Henüz puan verilmemiş

Yıldıza dokunarak 1–10 arası puan ver

Yorumlar

Yorum yapmak için giriş yapmalısın.

Giriş yap

Bu şiire henüz yorum yapılmamış. İlk sen ol.

Sana daha iyi bir okuma deneyimi sunabilmek için sitemizde çerez kullanıyoruz. Kişisel verilerin KVKK ve GDPR kapsamında işlenir; hangi çerezlere izin verdiğini dilediğin zaman değiştirebilirsin.