Walking In Blake’s Garden (18 Poems In Scots)

S Sheena Blackhall Sheena Blackhall
0 Altın Yaprak
1.The Tod frae the Wids Fin gloamin time begins tae saftly faa A tod cams steppin frae a brukken waa Its paws pad-paddin ben the widlan snaa The warld hauds its braith, the nicht is cauld A bodach humphs a puckle sticks, twa-fauld Winter is coorsest tae the young an auld The bodach weirs twa layers abeen his sark. He hashes hame afore the cranreuch dark The tod bides back an wytes in the braid park The chukken in the hen hoose on its reest O strae can cheep nae prayers tae ony priest Fin tod’s sherp teeth sook on its feathery briest The tod has littlins neth the fairy ring An they maun feed like ony leevin thing Hungeret, they winner fit their dam will bring For, like the bodach wi his bairns near-by Aa breets maun keep their ain frae gaun awry A family, pack, a flock, a herd o kye 2.A Fartin Cat I dinna gie a fartin cat For under-dugs. I sheet the craa Frae beggars priggin on the street I hash on by. I haud awa For I hae seen them, pooches stapped Wi coins frae the saft-hairtit stapped Ahin bare trees, aside a kirk Share junkie needles in the mirk An sae the siller pruves a curse That leads tae crime, coorseness, an worse 3.Scots Owersetts o Ho Chi Minh’s Poems From Prison A Fier’s Paper Blanket New buiks, auld buiks, the leaves aa haived thegither. A paper blanket is better than nae blanket. Ye fa sleep like princes, happit frae the cauld, D’ye ken foo mony chiels in jyle canna sleep aa nicht? Autumn Nicht Afore the yett, a guaird wi a rifle on his shooder. In the lift, the meen flees ben clouds. Heezin flechs, like blaik airmy tanks in the nicht. Squads o mozzies, like waves o attackin planes. I think o ma hamelan. I dream I can flee far awa. I dream I traivel trappit in wabs o wae. A year has cam tae an eyn here. Fit crime did I commit? Greetin, I screive anither jyle poem Cauld Nicht Autumn nicht. Nae mattrass. Nae happins. Nae sleep. Body an legs Huddle up an cramp. The meen glimmers on the cranreuch-shawled banana leaves. Ayont ma bars the Muckle Bear showds on the Pole. 4.An Owersett in Scots o Fishing in Autumn by Nguyen Khuyen The Autumn puil dreich, the watter caller I fish fae a smaa boat rowin here. Wee blue ripples spreid throw the mist The win, the leaves flee by wi the year Fae a deep blue lift hing raws o clouds On a bamboo pathie, naebody appears Knees tae briest, I cana pit doon this pole, Mony fish yark at the duckweed yonner. 5.The skivvies o Chatswirth Hoose, circa 1902 A hoosekeeper, Sax washer-wives A scullery maid A laundry porter A bylerman, Upholsterer, An odd job chiel, Twa windae cleaners A chaplain, secretary tae Jyners an stable farriers Sax hoosemaids Sivinty gairdeners, A still-room quine A groom o chaumers Twa lodge porters A nicht fireman Ae dairy lass A hired sparkie A coalman, Cook, an a hoose steward Pittin a stop tae aa malarkey A valet, steward’s room man, an usher The stable maister, groom an loon The Lady’s maid wi frocks an blusher The governess, The gamekeeper Three fitmen An the unner butler The nanny, nurse, fin littlins cam Wi titles prefixin their names The hale-jing bang employed tae tend Aristocrats an aa their games The peintins, marbles, busts an trock Noo ained bi the museum fowk Fad sikk tae dicht the plate an jorums Frae sic a rowth o Whigmalorums? 6. Jock Thamson’s Bairns in the Ship of Charon Charon’s boat is biggit for aa Bizzims, nickums an cyards Jaads an lairds an skinnymalinks Souters, fermers, bards Whyles the ferry is unca roch There’s stooshies atween the fowk There’s tuilzies atween the antrin tykes O gangrels, gomerils, gowks Bit aince awa frae the warld’s shore Strippit o flesh an fame It’s little account the starnies takk O the pouer o a body’s name 7. I mynd the wirds ma grannie eased tae spikk I mynd the wirds ma grannie eesed tae spikk The birdie wirds, like spurgie, dyeuk an craa Like whaup an peesie, yalla yeitie, erne At nicht they flichter roon the chaumer waa In dreams the meenlicht fulls wi grannie’s flooers Wannerin Willies, pee the beds an gowans The trees wyve in the starnies, birks, and saughs Geans, aiks an laricks, aipples, boortrees, rowans The shelts cam trottin by, wi antrin breets Yowes, brocks an bawds, twa puddocks frae a troch A sharny coo, a hornygollach clan A wyver wi a flech, a flee, a moch The weather wirds: like doonpish, dreich an cauld Blin drift, blin smore, snaa, birsslin heat an haar That fermer laddies watch for, fishers fear Rowin their boaties by the herbour bar Thon wirds o bairnhood, hinney in the lug Bide in the benmaist crannies o ma heid Granminnie’s wirds, sae couthie, kent an fine The wirds that are the reets o ma Scots leid. 8.Weather Maitters Ye’ve a meetin. The fowk are gey frosty An ice-brakker’s aywis the weather Is it mochie, or fooshtie, or jeelin or dreich? It’s the safest o bets for a blether We dinna hae steers like a monsoon Tornado or cyclone or waur Bit still we can girn an gie’t laldy Aboot blizzards an satt on the car Is it hett? Weel the midgies will like it Is it winny? It flattens the craps Is’t a doonpish? The gutters are chokit Unless it faas doon in wee draps. Is it snaay? An inch wid be certain Tae close aa the skweels roon aboot Ay the weather is fairly the topic Tae gar wirdies like flooeries sprout! 9.Mearns It’s April. Aa the parks are plooed The early craps are brierin The sap is risin in the trees Gulls ower the rigs careerin The lift is lichtsome, set for fair There’s daffies in the sheugh An showdy powdy in the wids Reest hoodies, coorse an teuch On the howe heids there’s skirps o snaa Grown smaaer ilkie day The gweed reid glaur o fermin grun Lies quate in Auchenblae The birlin turbines hairst the win Boats aff Steenhive rowe weel Fur aince the gurly waves are calm’s A puil at a bonspiel. 10.In a Rugby Park, Derbyshire Yowes in a park in the sypin rain Chawin awa, chawin awa Niver a scrum nor a tackle nor baa Garrin them faa, garrin them faa Craa on the goal post tholin the weet Teetin aboot, teetin aboot Rain teems doon like a brukken spoot Ower his funeral suit, his funeral suit Pheasant is coortin ower the line A birdie maun try, a birdie maun try Will he score as he follaes his dearie oootbye? She’s blate, bit he’s spry, thon pheasant, fegs ay 11.Seamus the Cuddy It’s a bad hair day for Seamus the cuddy He lowers his boddom lip Raises the draabrig o his teeth Lattin oot a roch ‘Hee-haw’ His een o navy-blue are dowie an weet Like tears micht drap Gin he shoogled his powe ower hard 12.Queen Mary, jyled The braw Scots princess, raised in France Damask and gowd were her bairn frocks Deerskin gloves on her leddie-hauns Cap on her heid happed reid-fair locks Gleg in Spanish, Italian, French Played the lute, could draa an sing Daunced an rade wi the great French lords Mary, bird wi a restless wing Wed tae the Dauphin aged 15 Twa short years an the idyll eyndit Ower the waves back hame she sailed Murder, rape, aa joy suspendit Wirthless husbands an fechtin Earls Mary’s choices war ay ill-wyled Fa’d hae thocht that her cousin Bess Fur 19 years wad haud her jyled Chatswirth brocht her a whyles remeid There, the Earl o Shrewsbury kept her Weel amused wi the hawk an bow Wi pets that the kind French courtiers sent her Till at the eyn, in Fotheringhay There, whaur Richard the Third wis born Hame o thon humphy-backit deil Mary’s heid frae her neck wis shorn The Earl o Shrewsbury grat, they say In Notre Dame, wi a wae oration The Great Archbishop o Bourges himself Spakk o the loss tae the Scottish Nation James the Saxth, whan he jyned the crouns Made Westminster her burial seat There in the Abbey, noo she lies Wi the Lion o Scotland at her feet. 13.Sheltie Sheltie wis the hudderie coatie Chawin girse wi yalla teeth In the lea o Stirlin Castle Think ye o the fowk aneth? Warriors beeriet in thon yird Focht wi arra an broadsword Noo, the stage o war’s a park Sheltie wi the hudderie sark 14.Latchy Spring Heich Bennachie an the Mither Tap’s Like a brock in a strippit jaiket An the breem an heath in the icy howes Is taiglit an hallierackit It’s cranreuch cauld in a latchy Spring The knowe-heids, fite an glimmrin The daffs are laith tae unfurl their flooers Mangst snaa-draps jeeled an chitterin There’s smirr in the nyaakit wids ootbye Dreich, dreich is the gurly cloud An the lammies born in the hap o snaa Step frae birth-caul inno a shroud A hardy billie’s the shepherd syne Wi his cromack an collie sikkin His flock in the blin-drift gloamin time Thrawn chiel wi his blue neb dreepin Bit the inbye fowk in office an toon Ken nocht o the winter’s blast In the cosy bield o their heatit neuks Ne’er a cloot nor a cover they cast Their siller is easy won an spent Till Mey wins throwe at last. 15. David Toulmin: Tune: The Holy Ground, traditional Irish Sea Shanty John Reid wis born tae a cottar An Buchan wis his hame Bit as David Toulmin he’s weel kent Fin his screivin name brocht fame Chorus: He wis ne’er dinged doon bi Fortune He wis clivver, gleg an thrawn An he grew in pouer wi each antrin shooer Frae a lad, tae a famous man He vrocht mangst glaur an slyster He tcyaaved mangst sharn an strae An the sweyt gaed sypin throwe his sark Fin he humfed great bales o hey Chorus: He wis ne’er dinged doon bi Fortune He wis clivver, gleg an thrawn An he grew in pouer wi each antrin shooer Frae a lad, tae a famous man His neives war rochened bi wirkin Bit his harns were keen’s a scythe As he jottit doon the antrin thochts An the spikk o fermin life Chorus: He wis ne’er dinged doon bi Fortune He wis clivver, gleg an thrawn An he grew in pouer wi each antrin shooer Frae a lad, tae a famous man At nicht, his pynts he wad lowse, syne Fin his tea wis hott’rin on the byle Wi an oor o peace, frae his darg, release He wad scrieve his tales fine style Chorus: He wis ne’er dinged doon bi Fortune He wis clivver, gleg an thrawn An he grew in pouer wi each antrin shooer Frae a lad, tae a famous man He wis ne’er acquaint wi siller Wi a rowth o schulin an gear Bit like ony lintie in the park His thochts rose heich an clear Chorus: He wis ne’er dinged doon bi Fortune He wis clivver, gleg an thrawn An he grew in pouer wi each antrin shooer Frae a lad, tae a famous man Sae here’s tae Mither Natur Fa wyes the Justice scales An tips them whyles gainst wealth an wyles Blawin win in the smaaest sails Chorus: He wis ne’er dinged doon bi Fortune He wis clivver, gleg an thrawn An he grew in pouer wi each antrin shooer Frae a lad, tae a famous man 16.The Ice Queen’s Panjotterels She’s awa tae caulder climes, Teemin oot the scrapins o her cauldron Leavin’s wi: Tooshties, nippicks, puckles, pyokies o sna Schmoodrichs drappit on firs Runkled like bridal sprays Like a French jabot Like Flanders lace In ilkie crannie an neuk In howe an sheugh Driven ahin the dykes in boorachies Like a moose chittered shroud Makkin a tinchel roon a puil A torc o frost Thon divots an dauds o drifts Ice Queen’s panjotterels 17. On the Death of Margaret Thatcher Passin road kill by Scotch Corner (Pertrick in a puil o reid) Bleep! A message on an i-phone Chirrups ‘Margaret Thatcher’s deid! ’ Flooers on the antrin crash site ‘Cannie drivers! Cut yer speed! ’ Miners on the airwaves claikin Aboot Margaret Thatcher, deid. Lue or hate her, sae divisive… Dae ye staun for need or greed? Thon will colour yer reaction Noo that Margaret Thatcher’s deid Hairt o steel, a hard big wigger Tory o the permed heid Haun bag swingin Iron Lady Nation…Margaret Thatcher’s deid! 18.Chesterfield Spire (1) Chesterfield kirk has a cruikit spire It wis twistit throwe a begeck Fowk say that a vergin wis merriet there Unheard o in sic a Haly lair Gawpin doon caused the crick in its neck

Bu şiire çeviri ekle ·

Bu şiiri puanla

Henüz puan verilmemiş

Yıldıza dokunarak 1–10 arası puan ver

Yorumlar

Yorum yapmak için giriş yapmalısın.

Giriş yap

Bu şiire henüz yorum yapılmamış. İlk sen ol.

Sana daha iyi bir okuma deneyimi sunabilmek için sitemizde çerez kullanıyoruz. Kişisel verilerin KVKK ve GDPR kapsamında işlenir; hangi çerezlere izin verdiğini dilediğin zaman değiştirebilirsin.