Âgâz-ı Gazeliyyât 65
A Agah
0
Altın Yaprak
Huzûr-ı yârdayuz kîl ü kâlimüz hoşdur
Zamâne hâlimüze korsa hâlimüz hoşdur
Alur vebâlimüzi nakd-i zühd ile zâhid
Bu bey‘gâhda benzer vebâlimüz hoşdur
Hayâl-i yâr ile nâzik hayâl söylenürüz
Miyân-ı ehl-i suhanda hayâlimüz hoşdur
Çemende bülbüli ey gül‘izâr neylersin
Bizümde tûtî-i şîrîn-makâlimüz hoşdur
Kad-i hamîdemüz Âgâh ceng-i ‘işretdür
Neşâtda meh-i ‘îdüz hilâlimüz hoşdur
Kamu malı: şairin ölümünün üzerinden 70 yıldan fazla geçti.
Bu şiiri puanla
Henüz puan verilmemiş