जिख्लाबसे लाइजाम: 'रैसुमै'नो 1-53
R
Ronjoy Brahma
0
Altın Yaprak
1
नोँखौ मोजां मोनो आं
नाथाय मिथिया
मानो मोजां मोनो।
2
गोसोआ सानो-
मानो हास्थायो आं नोँखौ?
नाथाय
बे जौमोनआ मानिनाय गैया।
3
उन्दै समावनो सानोमोन आं
बियो आंखौदि मा सानोथाय-
दिनैबो मिथिया मोजां
मादि सानो गोरबोजोँ।
4
नोँनि रादाबा दुखु होयो,
गोरबोजोँ सानहाबो आं-
अब्लाबो नोँखौनो मोजां मोनो।
5
आं फोरमायाखै नोँनो-
आंदि नोँखौ सिरि सिरि...
नाथाय नोँबोदि नाजायाखै
बेखौ मिथिनो?
6
आं जोबोद सानो-
खालि नोँनि थाखायल',
जेबो जेबो समाव
गोरबोजोँ।
7
गोदान बिबार बारोब्ला
सिखिरिया जेरैबादि खौरां लायो,
आंबो थायो जेब्लाबो सानबायना-
नोँनि थाखाय सना।
8
नोँ मा सानो?
आं मिथिया,
आं बुंनो हायाखै खुगाजोँ;
अब्लाबो गोरबोआ
गोरबोआव बुङो-
आं नोँखौ मोजां मोनो।
9
नोँ मा बुंगोनथाय?
आं बेखौनो सानो...
अब्लाबो आं फावस'या मोनसे
रंजालु गोरबोआ।
10
नोँ खोनायाखै खोमाजोँ,
मानोना आं बुङाखै खुगाजोँ;
नोँ जेबो सानाखै,
थारैनो आं फोरमायाखै।
11
आं रायदावदोँमोन मिनिस्लु,
नोँ फिन्नाय होदोँ लाजिस्लु;
गोसोआव दङ नोँनि गोदै मिनिस्लु।
12
आं थाबायदोँमोन-
नोँ गोजोन लामा सेराव
जिरायना दंमोन,
माबा सानना नायहरो
खेबसेबाव आं।
13
नोँनि सावगारि जावले फैयो
मिनिस्लु गोरबोआ सानहाबो-
नोँ आंखौ मा सानो?
सोँलुवा गोरबोआव फैयो।
14
जिरि बोहैनाय जाम्फैयाव
दुगैदोँमोन नोँ जोबोद खुसियाव,
लामा सेरजोँ आं एरायदोँ
मिनिस्लु मिनिनायाव।
15
दिनै आं खन्थाइ सुजुदोँ,
नोँनि मुं लानानै;
गोरबोआ सना मिनिस्लु जाखांदोँ।
16
जोबनो गैयै लुबैनाय जिउआव,
नोँखौ साजायो आं-
गोरबोआव अराय हिनजाव गोदान महराव।
17
आं थाबायदोँमोन मेँग्लिनायजोँ,
नोँ दैहु फाफेरदोँमोन हार्सिङै
जेबो रायज्लायाखै सानैजोँ सिगांआव।
18
सानबाय थायो सिरि सिरि
हाजोनि निजोरा-
बोहैनायबादि जिरि जिरि
गोरबोआव हास्थायो एब्रेनो।
19
मादि खालामो मुं आरो मुस्रिया
नोँखौनो सानबाय थायो गोरबोआ,
सना नोँनि अननाय गैया थेवबो।
20
गोबां रंजानाय गोरबोआव
बाज्ल'दोँ आं माबा ओँथियाव,
बरायनाय गोसोयै बैसागुखौ-
नोँ नायखोमादोँ मिनिस्लु आंखौ।
21
रादाबा आंखौ उसु खुथु खालामो
नोँ बुंदोँमोन-
गाजा नोँनि सावगारिखौ थारै...
हमथा हायै खुसियाव मिनिदोँ।
22
नोँनि मिनिनायखौ आं नुदोँ,
नाथाय आं-
जोबोद गोथौयै सानहाबदोँ।
23
आं फोरमायनो हायाखै
फोरमायनो लामा गैया,
मानोना नोँ आंजोँ साफिया।
24
सिमां नागिरो आं नोँजोँ
समायना बेराय बेरा सावरायनाय,
सिमांआवबो साफिया मानोबा।
25
दिनै नोँखौ लाजिनाय नुदोँ
नोङो लाजिदोँ सोरखौबा?
मेगनाव जोबोद मुहिदोँ।
26
गोरबोखौ बोनानै लांबाय
ना नोँ बिरथिँ होबाय?
अराय समाव सानबाय आं नोँनिल'।
27
मोजां मोनखोमानाया गेङाखै,
बयबो रावबो मिथियाखै;
आंल' मिथिगौ, फेलेँ थाङाखै।
28
नोँखौ सान्नानै समा बाग्लायो
खाथि खाथि सोरां फुंआ फैयो,
माब्लादि साना हाबलाङो
नोँखौ नागाराखै मोजां मोनो आं।
29
नोँनि अनगा मेगना गेवा,
खोमसियाव थायो मेसेबब्ला;
रैसुमै बेरला बेरथा जायो गोसोआ
हुफ्लेयो मैखि खानाय मेगन मुं खोनाब्ला।
30
गोरबोनि लामा नागिरनानै
मेगननि सिखाव गोसोआ
मेँग्लिना थायो सानसेबा दिनै।
30
गोजावलाङाखै आंनि गोसोआ
गोगो बोहैलांदोँसो निजोरा;
सुदेम लुफावनो नोँनि गोरबोआव
नागिरो गोसोआ, खाबुखौ मोनाखै।
32
गोरबो सिङाव मादि सान्नाय
गासैबो ओँथिया नोँखौ सिरि सिरि
खालिबोल' गोथौ मोजां मोन्नाय।
33
मोजां मोन्नाय सोदोबा गलिदोँ
सिउ सिउ बारजोँ बुग्लेम जायाखै,
गिथाव जौमोननि बिलोआव
दं दिमोल जानानै;
बोहैयाखै नोँनि गोरबोआव।
34
सोनाब फैसालियाव जोँमा सान,
मिनिस्लु मोखांजोँ नायहरो-
अनजालिनि गोजोन लामाजोँ।
35
नोँखौ साननानै नायहरो-
फैगोन थाबायनाय लामाजोँ...
मिनिस्लु साजायनाय गोरबोआ।
36
नोँखौ हास्थायनाया गोमानाय नङा आंनि
जेब्लासिम थागोन जौमोन समा;
नोँखौ मोजां मोनखोमाना थागोन
जेब्लासिम जाया जुलि नोँनि।
37
थागोन सिरि सिरि सिरि
मोजां मोनना गोथार नोँखौ,
सानगोन आं नोँनि दुखुखौ
बेरखांनाय लाइमोन जिउ मायाखौ।
38
जेब्ला नुयो मोखांआव नोँखौ
सानो आं जिउनि संसारखौ।
39
जेसे समाव नोँ मिथिगोन
एसे समाव आं फोरमायगोन,
एसे मिनिस्लु लाजिगोन
गावनि गोहोखौ फोरमायगोन।
40
जेब्ला नोँ हमदां हागोन
आं नोँखौ बुजि होगोन,
आबुं हास्थायना मोजां मोन्नायखौ
थरथिँसे मोदैजोँ फोरमायगोन।
41
हसारनाय खानायखौ फाफ्लियाव लाना
थाबायग्लांदोँ नोङो गोजोन्ना-
मुहियो मेगनाव,
सानो आं गुथालाव मानोबा।
42
आंनि गोरबोआ नोँनाव एब्रेदोँ
गासैबो हादोँ हमदांना,
बेखौनो सान्ना मोजां मोनो।
43
नोङो मिथिया बेखौनो?
नोङो हास्थाया नामा?
सिरि सिरि आंदि थेवबोनो।
44
नोङो आंखौ मुगैगारब्लाबो
थागोन आं दखना रोबैयाव,
समा फैयो अब्लासिम;
मिजिँ आरो गोरबो लानानै।
45
जा मोजां मोनहाबबाय जिउआव
लिरनाय थाबाय हांखोजोँ,
दुखु गैया नोँ नेवसिब्लाबो।
46
हरसान जेसेबांदि सानो
सिरि सिरि मोजां मोनहाबो,
बेसेदि मेथाइ गोरबोआव
खन्थाइ लिरो नोँनिनो।
47
नंथारगौ।नोँखौ बरायाखै अख्रायै
मोजां मोन्दोँ बेखौल' बुंगोन;
गोजोन होयो बेनो आबुं जौमोनाव।
48
गोसो आरो गोरबोखौ
नागिरो आं नोँजोँ गोरोबनो,
गोजोन सानसे गोजोमहैनो।
49
नोँ आंनि सान्नायखौ-
मोन्नाय नङा जेथो,
बुजिगोन खोनाब्ला देँखो गैयै गारांखौ,
बोखारनानै नायब्ला सोदोबखौ।
50
फारागनि सिगां सोदोबखौ
खोनानोल' मोनथोँ, बे बाथ्राखौ-
आंदि नोँखौ साजायो गावनिबादि;
मोजां मोनो आं।मोजां मोनो।
51
जाय बिबाराव थायो समायना
बेनि ओँथि मोनबाय आं,
सानो आं बेनिखायनो
मोजां सिरि थेवबोनो।
52
बेसेबांदि थाबोबाय दिन मेला
महर मुस्रि नुबाय आं नोँनि,
सानना नायबाय आं गावनि
थाइनै मेगन।गोरबो दरजा खेवना।
53
जायखौ आं सानबायदोँ
बुंनो बुंनो गोरबोआव-
सोदोबा फुथिया ओँथियाव
गासैबो समायनाय थाखोमायो।
Bu şiiri puanla
Henüz puan verilmemiş