जिख्लाबसे लाइजाम: 'रैसुमै'नो 283-319

283 साग्लोब फैयाखै खोमसिया नोँनि आंनि खन्थाइनि रुगुंआव, बिरबाय लाङाखै दाउसिना नोँनि आंनि मेगनाव; दाबो दं खोलो खोलो गुसु बारा नोँ आंनि गोरबो गोसोनि। 284 गोरबोआव घौ सोदोबनि नोँजोँ नुज्लायनाय समफोरनि, मादि गाबखाङो बिखानि देँखोआ। 285 साजायना लानायल' जाबाय बिखानि उल्टां-फाल्टां सानो गोसोआ, गैया बुखार जानाय जोमैनि- बेँदिँनाय गोरबोआव खुवानि निहोर बोहैनाय सानस्रिनि। 286 नोँदि नुआखै बिखानि गुसु जानाय हास्थायनायखौ, आरोबाव खेँखुद जानाय गोसोनि- रं- बिरंनि मिलौनाय सोदोबखौ, आंदि सानदोँ- नोँ आंनि।नोँ आंनि। 287 बेसेदि नोँ सिरि सिरि- नोँ बुङा दाबो खोमायाव, फैगौ बेला लामायाव गाबगोन नोँ फैगोन दाबि मोखांआव। 288 नोँनि मुस्रियाव थाबथानाय आंनि गोरबोआ हालिया, - नोँनि मेगनाव रंजानाय आं मोननाय मोनै गोजोन्नाय मिथिया नोँखौ आं बिजिरना। 289 गुसु बार, गुसु निहोर दिनैनि फुं फुषनि खुवायाव मुसुरदाव हरनो गोसो देँखोजोँ- नाथाय हमदां मोनगोन दाबि नोँ? उनफिनो आं रादाब दैबायना। 290 गोबां गोहो, गोबां रंजानायजोँ सान्दोँमोन फोरमायनो दिनै, माबा सानो बुंनो गोरबोनि- बुंनो हाया, हांमानि गोलाव खौरां, गाबो आं जेन्नानै गोसोआव। 291 माबादि रंजानाय जाखो आंहा मोखांआव नोँखौ मिनिस्लु नुनानै, गाबनो ओँखारो गोरबोआव नोँखौ सानै सानैनो इयुननि। 292 सानबायनाय मिजिँनि हन्थायाव नोँनि आरो आंनि लोगोआव, नेबायसै गोरोबनाय हरै मारुंआव, रैसुमै आं गोथौ लैथोआव। 293 आबुं जाबाय आंनि गोरबोआव नोँनि सुजुनाय लामानि सावगारिया गोदै नोँनि मेथाइनि देँखोआ, बावनो नाजाया जेबो गोरबोआ। 294 रैसुमै नोँनि गोरबो फर्दाखौ सना दादोन गोसोम फांथेनानै, नोँ बुंनो हागौ आंनि खोमायाव मोखांजोँ मोखां मेगनाव मिनिनानै। 295 दिनै मिनिनायनि मोखांआव गयो मोदै मेगनाव आंनि, जाफुंनाय-जाफुंङै सान्नाय मिजिँनि- रैसुमै गैया खुगायाव राव मोखांआव नोँजोँ आंजोँ जोँमानि लामायाव। 296 गोरान बारानो रंजा होयो नै आंनि रैसुमै गोरबोनि- नोँनि मेथाइनि सोदोबनि सोदोबा गोरबोआव खनफ्रोम गुथाला दैखाङो। 297 नोँनि जोनोमनि मुस्रिखौ मोजां मोन्ना आन्दायनाय गैलिया सोदोब बिखायाव, सोरां खोमसि बिलिरलांब्लाबो- आनज्राया मेगनाव नोँनि महरा। 298 नोँनि मेथाइया गोजावो खोमायाव आरोबाव आं रोजाबो फिन- नोँनि आंनि गोरोबनायनि, खोनाहैदोँ दाबि नोँनि गोरबोआव? । 299 खुसिनि मिनिस्लु आगान होनाय समाव लोगो मोन्दोँमोन दिनै लामायाव, मिनिस्लु मिनिस्लु नोँ आंनि मोखांआव समा होआखै रायदावनो खाबुखौ। 300 नोँनि गोरबोआव एब्रेनो नाजायो नोँनि बिखानि फांथेनाय फर्दायादि होआ हाबनो गुसु बिलिरनायखौ, बार आं लिजिस्लु नोँनि सेराव। 301 जिउनि गोथार मिजिँ लानानै हास्थायबाय थायो जेबो साननानै- फैसालि रुगुंआव नोँनि आंनि देरा खानानै। 302 नोँनि मोखांनि मोदानफब मिनिनाया नांफैथारो आंनि मेगनाव, नोँनि लाजिस्लु खावलायनि दौ दिमपला आंनि गोरबोआव एवथुथारो; माबा सान्नानै लाजिस्लु गंस्रियो आं, हास्थायनाय सिँ सिँ गोरबोआव सान्नाया। 303 थब्ल'नानै नोँनि गोरबो लैथोआव समा बारलांथारबाय बेसेबा ग'गायाव, लायो अब्लाबो गोबाथुमनानै नोँखौ मोजां मोननाय सोदोब ओँथिखौ- आंनि जिउ बिखा बुंजासे। 304 जाय जोनोमाव नोँखौ हास्थायबाय जोँमानि सोरां लामायाव नुनानै, थाबाय आंनि नोजोरा नोँनियाव आंखौ बाथुम फैबाय सोदोबा रैसुमै, नोँ आंनि।नोँ आंनि। 305 गोसोआ दानिया नोँनिथिँ आरो हरै हास्थायनाय मारुंआव। 306 नोँनि महर मुस्रिनि सायाजोँनो गोजोन्नाय मोनो जेब्लाबोनो, नोँनि साजायनाय सोलेरावनो सुजुयो गोबां खन्थाइखौबो नै रैसुमै आंनि- हास्थायगोन आंनि जिउ लाइमोनानो। 307 जाय गोरबोआव नोँनिनो मासिया जेराव साजायनाय गोथार मन्दिरा, जुलि, अर सेरनि सिन्दुरा बेवनो दं मिनिबाला बालानो- हांख्रा हरो आर'ज जोँमानि लामाया। 308 दोँसे मिनिस्लु मिजिँनि लामाया सिं सिं रिमिन्नाय मोकथांआव, नै सना आंनि- थाबायलाङो सानबायै लिँ लिँ हांखोजोँ। 309 माबे मिनिस्लुनाय ओँथिनि दरखंआव साजायना फैयो आंनि मोखांआव, नै रैसुमै फोरमायगोन नोँ खोमायाव, नोँनि थाखाय आंनि साजायनाय गासैबो? 310 आंनि खनफ्रोम थाबायनाय लामायाव साया-माया नोँदि मिनियो... आंनि आगानफ्रोम आगानाव नोँनि मेथाइ रिँखाङो... रैसुमै नोँदि आंनि सेर सेर मिजिँआव। 311 नोँ सोरनि थाखाय मिनिस्लुयो मिथिया आं सानबायो... नोँ सानबायो, सोरनि थाखाय? हमदांनो नाजायो हर-सानफोरावबो आं। 312 नोँहा मिनिनायनि ओँथि दंङ बेयो घोन मोनसे महरनि, नाथाय नोँहा गाबनाय गैया; जोमै साग्लोबनाय दोमैलु मोखां आंनि हास्थायो गोरबोआ बोजबनो नोँनि...। 313 नोँनि मिनिस्लुनाया मोखांआव बिलिर फैयो गुसु मेसेबनायाव, गोथौ गोदोहाबो दान्दिसे मुंङै लैथोआव घौ गोरबोआव रंजानाय नुनायाव। 314 गोरबोनि दरखं दरखं मागियो नोँनि गुसु एब्रेनाय गोरबोआव खौरां, मोकथांआव नोँनि मिनिनाय सिमांना नोँनि जंखायनाय? नोँजोँ आंजोँ हालियाव हरै...। 315 खुवाया साग्लोब फैनाय मोखांआव गुसु बारा मेथाइ रोजाबो, बिफां-बिलाइया खबाम साजायो रैसुमै नोँनि आंनि गेजेराव... जिउआव मुसुर फैयो गोदै देँखोजोँ। 316 बेसेदि सान्नाय, बेसेदि हास्थायनाय दं आंनि गोरबोआव एब्रेनाय, बेसेदि साजायनाय, बेसेदि मागिनाय रैसुमै, आंनि गोरबो इसिँआव। 314 लाइमोना जेब्ला लह्राय लाङो बावगारसिगोन आं फेलेँआव, हास्थायनाय गोसोनि गलिनायजोँ रानलांसिगोन मोदै सान्नाय गोरबोआ। 318 खोमसि फैसालियाव आन्दायनानै थाबाय आं नोँनि दरखंआव, सोरांनाय मिजिँ खालामनानै नेबाय आं नोँनि लांगोनायाव; गोरोबफै आंनि गोथार गुसु बाराव। 319 पुषनि फुंआव जोदोमनानै थाबाय मोकथांनि लाटासे आंनि बिखाया, थांलाय-फैलाय खालामनाय आंनि आब्रा हास्थायनाय गोरबोनि; गोबाव जाबाय खौरां लामायाव।