Crossing The Bridge (Scots Poems)

At Coull Kirkyaird Ye've jinked the mools an ye've skipped awa Stepped oot o yer mortal claes Aroon lie anely the aisse an stoor Dry banes o fowks' warldly days An unkent journey we aa maun makk Wyte lad, fur I'm close ahin ye I see ye yet, tho yer bit a shade Tho marred bi the tears that blin me An whether ye gyang tae Angus Og * Or tae Paradise in the lift May the time be short afore I see The Bean Nighe** rinse her shift A Scots Owerset o the poem Requiescat bi Oscar Wilde Wauk lichtly, neth the snaa she's lyin near Spikk doucely, she can hear the gowans brier Aa her bricht gowden hair, wi roost turned soor She fa wis young an braa, drapt tae the stoor Like a swack lily as fite as the snaa She cheenged tae a wumman Grew doucely an braa Kist-boord an wechty stane lie on her briest Lanesome, ma hair is sair noo she's at rest Peace, peace she canna hear lyre or sonnet Aa ma life's beeriet here. Hap yird upon it Along the River During the Qingming Festival Scots Owerset from Vietnamese Scots Owerset of a Vietnamese Poem Faist swallas an spring days wir skytin by; O ninety sheenin anes saxty hid fled. Young girse spread aa its green tae heiven's tap; Some blossoms merked pear branches wi fite dots. Noo cam the Feast o Licht in the third month Wi graveyaird rites an deinties on the green. As blythesome pilgrims flocked frae near an far, The sisters an their brither gaed fur a daunder. A Sequence of Poems commissioned for an installation project about Bennachie by the Forestery Commission, Scotland Reid Squirrel Reid squirrels hae lugs wi tufty hair They skyte up a tree like a michty stair Gin they hear ye…wheech, they're gaen A glisk ben the wids like a straik o flame Bennachie (1) Hame's far the hairt is, the landscape o langin Aybydan Mither, the Ben o belangin Bennachie (2) Braith o the Ben is girse an whin Heather afore an trees ahin Meenlicht on Bennachie, starnies sae sherp Hoolets wings flichterin, saft throwe the derk Maiden Stane Stranger-Danger! Watch yersel! The Deil takks maidens for himsel! Romans, Picts wi hairy knees Are they watchin throwe the trees? Bennachie (3) Rowan tree, bracken, scree Peesies pipin, dockens doverin Yeities cheepin, saughs greetin Yowes hirplin, glegs sookin Shaddas raxxin, rabbits lowpin Kye, chawin, sun swytin Futterats rinnin, snailies slidderin Beech reeshlin, bummers bizzin Dubs dryin eftir storm The Colonies fowk biggin wechty waas strang stoot granite stanes bield fort hame ferm Buchan billies sturdy banes people building heavy Walls strong stout granite stones shelter fort home farm Buchan men sturdy bones Cheengin Sizzens Reid deer, roe deer Ower Oxen Craig they're reengin Bennachie throwoot the year Colours, Sizzens cheengin The Hub At the hub o the Ben sikk oot a trail Rabbits' roadie, hawks' flicht path Siller cercles o snailie Tick-Tock Bennachie stauns stinch throwe aeons Dragonflee's gaen in a glisk Teetie-Bo! Widpecker chaps on timmer Win soughs in the larick Pine trees reeshle thegither Simmer air, sun glimmer Gilree Burn Tinklin ower foggy stanes Peaty burn, trinklin doon Shamrocks skirp the girssy bank Sappy wavelets, furlin roon