The Win & The Rain (10 Scots Poems)

1.Singleton She trauchles tae the shop an hame Shovin the bairn he left ahin A heavy wecht. Her hairt is stane Nae skirp o solace can she fin Fur aathin noo is secunt-haun Her days are soor. Her bed is cauld Welcome tae single parent lan! He's gane an aa she dis is scauld Foo pleased she'd bin tae gie him this The livin pruif her luve wis true! He's gane. Noo, sorra kythes frae bliss Rose gairdens wither intae rue His een luik frae the bairn's face The littlin in the faither's place 2.The Lads Margot, a washed oot lily at fifteen Publicly coorted in the spot-lit street Dutch bulb, turned bleedin tulip at sixteen Annabell's lads were niver nine tae fivers She cam hame late, in sporty, phallic cars Her beaux wore Rolex cuff-links, wir high-fliers Lana wis blate an couthie, unca plain Her da's pipes nott a stream o merriet plumbers Wi ane o them she ran aff doon the drain Nae winner yer still single, ' I wis telt. `Ye've got tae wink an ee, an grind yer hips Ye've got tae smile, tae pout, tae strut yer stuff Hitch up yer breists. Smear sex alang yer lips.' I trapped a lad at last, at an Arts Ball Half-canned, he socht me hame at the last daunce I stood, a tattie-bogle in a park Pykit bi craw-pecks. Ah la belle romaunce! 3.Kieran Christie Spikks tae the Social The first luve that ma hid wis Steve A seaman. Oh the tales he'd wyve! He tuik me tae the watter front Thegither we wad cockle-hunt He vowed he'd niver leave. He kissed Janine. Ma hid tae heave Him oot. Nae cam-back, nae reprieve. My secunt da wad booze an grunt... I wish I wis a Spanish ship, a -sailin the high seas Skweel says I bully an I thieve That I'm ower hyper tae achieve Da nummer three says I'm a runt That I maun takk the things I wint That happiness is makk-believe I wish I wis a Spanish ship a-sailin the high seas 4.Tae them wi nane, be gien. The barfit fishers on the beach, their fyew possessions teen Greet that the sea has netted men. Tae them wi nane, be gien. The western pleisur sikkin fowk lived throw thon widdendreme Bairns, hames an aa wheeched aff like straa. The ocean wyves abeen. The lauchin bairn, the wirkin cheil, thegither or alane Dauchled tae watch an Act o God, an in thon dwaum war taen The sea that washes Thailan's sides, bathes India's backbeen Sweetens Sri Lanka wi its tides, turned traitor this foreneen Stole frae the puirest o the puir afore ocht cud be daen Even the bairns frae oot their airms. Tae them wi nocht, be gien 0 far's the Wise Men in the East that cudnae hae foreseen The sea rise up like a grey wolf wi murder in its een? The nations roon the Indian Sea, they hae nae siller speen May loaves an fishes multiplee...tae them wi nocht, be gien. 5.Connor McGraw He's dunted the shepherds and skelped the kings Cowped sweet Jesus ooto his staa Connor McGraw. Fa'll clip his wings, The angel fa irritates ane an aa? The Bethlehem scene's gaen rick-ma-tick Foo is the cuddie weirin a croon? Fa's thou turnin the ither chikk? Moonin aboot wi his troosers doon? He's echt years auld bit acts nineteen His ma is staned fin he gyangs tae bed He watches the bang-bang TV screen Till three a.m. wi his wide-eed Ted `What's St Nicholas bringing you, ' The teacher speirs, 'from his great big sack? ' Connor McGraw thinks hard and says `He's bringin ma bluidy game boy back.' Echt a.m. an Santie's been Aathin Connor McGraw could need Aathin's awa bi twelve fifteen Selt fur fags an a fix o speed. Connor McGraw he's haived a brick Throwe the shop wi its Xmas show Sen fur the social worker quick It's nae even rowed wi a festive bow! Reindeer sleigh's here, presents galore A time fur blitheness, a Disney show Connor's minder's the chiel neist door Bring on the punch an the ho- ho- ho Xmas star dae ye shine sae fair Jist for the sake o the lucky fyew? Is there anither star oot there, Fur Connor McGraw? Is it gowd or blue? 6.Winter In the mochy dreichness o winter, Girse weirs a frost straichtjaiket In an oot-o-sicht sheuch, Reeds chitter, like a strang electric shock's Bin sizzled throwe their verra banes an marra Barbit wire grips in weird parks o wae Blin-drift boos trees wi grue, The harbinger o sufferin an sorra. Braes rikk wi cranreuch cauld. A hawk gaes flichter flachterin ower the wids His name is Daith. Wallopin hungered wings His wyme aye gaps fur maet Clouds stappit wi Yule Writhe like a wud wife in a jizzen This is the coorse sizzen The jinniprous spruce is sherp's a jaggy glaiss Dule swypes in wi the derk, in mugger's claes Ettlin tae rype the warmth o the braes Coffm fodder, hirplin rubbits squeak Snadrops heidbang eyndless, at the grun Tryin tae leave afore the funeral's by. 7.It's Cauld, oot/ Blue Toon Hipsters The hardest hairy in Peterheid is young Tallulah Bruce She's a bairn in a pram like Desperate Dan That she feeds on jungle juice. Insteid o a dummy it sooks a nail. It's got its mither's luiks The hair on its heid is post box reid. A mountain reenge o plooks Rise ower its chicks like the Grampians, It's niver bin heard tae greet I's sweir its da wis a batterin ram, It disna spik it bleats. Tallulah's aff tae fetch the tea Some chips an Bacardi rum Tae keep the frost o the North East Coast Fae nippin her builder's bum 8.Ghaisties Creepin up the Ship's Raw, bi crooked wynd an lane, Nigh sax hunner ghaisties they takk the low road hame Nigh sax hunner ghaisties... their kistit banes lie cauld Atlantic waves sair pairtin the New Warld frae the Auld They seek their blythesome bairnhood, afore they war waylayed Near herbour or bi schooner... the sleekit slavers' trade Bit oh, the hames that murned them are nocht bit stoor an win Nigh sax hunner ghaisties an nane tae lat them in 9.The Auld Alliance `Bonjour, ' says Jean, 'Fit like? ' says Jack, The Xmas tree stauns green an swack Bairns birl aroon the skatin rink Electric angels sway an blink Ower Union Street this Northern Yule Richt hairtily fowk banish dule Wi Santy hats an reindeers lugs They buy hot dogs an woolly rugs Dutch tulips sell far revellers dance Roon staas an olives frae Provence. Aiberdeen rowies, French baguettes Are bocht, wi flooers an glaiss chess sets Rich pastry an sweet clementines Weel hanselled by the festive chimes As Mither Kirk bells ring the cheer The last wikks o the deein year `It's gran, ' says Jim. 'C'est bon, ' says Jacques 'The Auld Alliance hist ye back! 10.The Wagtail and the Nightingale Tune: The Buchan Bobby A wagtail an a nightingale met in the Music Haa The nightingle, a native o the toun o Aiberdeen Stept oot an shook her plumage, the audience wis braw Sae quaet ye cud hae hearkened tae the drappin o a preen Rossini an Puccini soared, their lyric tunes took flicht The velvet o the curtains like the Heivens up abeen The jewels on the soprano glittered like a winter's nicht Fin the wagtail an the nightingale appeared in Aiberdeen The wagtail wis a fiddler, yarkin up an doon the bow His music telt the stories o Grantully an Cromar Fae the shakkins o the pyockie tae the hertbrakk o Neil Gow As frisky as the whisky at the dowp o Lochnagar There wis Tosca an McCrimmon an the beddin o the bride The watch-chyne at his westcoat keepin time tae ilkie tune Buenos Aires an Connecticut, Loch Earn an Bogieside An a magpie at the concert pianie playin Clair de Lune Music is the sweetest medicine fae the cradle tae the kist Wi the pouer tae cheer in hospice, an tae kittle up a ward Wi the wagtail an the nightingale the peel wis double blessed In a nicht o stars an music, in the toon o Bon Accord!