Malayalam 913 ഭാഷാന്തര കവിതകൾ (13) വൃത്തം

This is translation of the poem "Circle" by Poet fatemeh zolfagharian കാലം ഏറെ അടുപ്പത്തിലായിരിക്കെത്തന്നെ- യൊട്ടപരിചിതരാമിരു ചങ്ങാതിമാർ, മരണവും ജീവിതവും, തമ്മിൽക്കാണെ- പ്പരസ്പരമെതിർക്കും മാത്സര്യ സംഘർഷണം. ജീവിതം നനുനനുത്ത ഒരു പൂവിതൾ, ഒരു നിശാശലഭത്തിന് പോലും പറക്കാ- നിടമേകും കാലത്തോടു ചേർത്ത് വ്യാഖ്യാനിക്കപ്പെടേണ്ടുമൊരിതൾ. നിശാശലഭം ആഴമേറിയതും എന്നാൽ ആദ്യജന്മദിനപ്പുലരി കാണുംവരെക്കൂടി ദൈർഘ്യമില്ലാത്തതുമാമൊരു ഹ്രസ്വ- ജീവിതത്തിന് സ്പഷ്ടമാം നിദർശനം. പുലരി ഏറെ അടുപ്പത്തിലായിരിക്കെത്തന്നെ- യൊട്ടപരിചിതരാം മിത്രങ്ങളിരുവർ, രാവും പകലും തമ്മിൽ കണ്ടുമുട്ടുമ്പോ- ളുളവാം കലഹരണിത ശോണകാളിമ!