Sara Teasdale 71 - പ്രേതാത്മാവ്

പ്രേതാത്മാവ് This is Malayalam translation of the poem 'The Ghost' by Sara Teasdale. കലമ്പുന്ന ആ നഗരത്തിലേക്ക് ഞാൻ തിരിച്ചുപോയി, എന്റെ പഴയകാലകാമുകർ താമസിക്കുമിടത്തേക്ക് ഞാൻ തിരിച്ചുപോയി, പക്ഷേ, എന്റെ ഹൃദയം നിറയെ എന്റെ പുതുപ്രണയിയുടെ മഹിമയായിരുന്നു, എന്റെ കണ്ണുകളാകട്ടെ നിർഭയമായി ചിരിച്ചുകൊണ്ടിരുന്നു. എന്നെ ഭ്രാന്തമായി പ്രണയിച്ചിരുന്ന, എല്ലാവർക്കും കേൾക്കാനായ് തന്റെ പ്രണയം ഉറക്കെ പറഞ്ഞ- യാളെ ഞാൻ കണ്ടുമുട്ടി. എന്നാൽ ഒരായിരം കാര്യങ്ങൾ പരസ്പരം ഞങ്ങൾ സംസാരിച്ചുകൊണ്ടിരുന്നു, പഴയകാര്യങ്ങൾ വളരെ ആഴത്തിൽത്തന്നെ കുഴിച്ചുമൂടിയിരുന്നതുകൊണ്ട് ഭയപ്പെടാനില്ലായിരുന്നു. മറ്റെയാളെയും ഞാൻ കണ്ടുമുട്ടി, അയാൾ തന്റെ പ്രണയം പ്രകടിപ്പിക്കാൻ ഒരിക്കലും എന്നെ ചുംബിക്കയോ ഒരക്ഷരം ഉരിയാടുകയോചെയ്തിട്ടില്ല- ഓ, അപ്പോഴാണ് ഉഗ്രഭയം എന്നെ ഗ്രസിച്ചത്, ശ്വസിക്കുകയും ഇളകിയാടുകയും ചെയ്യുന്ന ഉച്ചരിക്കപ്പെടാത്ത വാക്കുകളോടുള്ള ഭയം. ചിരിച്ചുകൊണ്ട് ജീവിക്കുന്ന പ്രണയവും മിഴിനീരിൽ ജീവിച്ചു തീർക്കുന്ന പ്രണയവും ഇല്ലാതായേക്കാം- പക്ഷേ ഒരിക്കൽപ്പോലും തുറന്നു- പറയാത്ത പ്രണയം കറങ്ങുന്ന വർഷങ്ങളിലൂടെ ചുറ്റിക്കൊണ്ടേയിരിക്കും, ഒരു പ്രേതാത്മാവിനെപ്പോലെ. കലമ്പുന്ന ആ നഗരത്തിലേക്ക് ഞാൻ തിരിച്ചുപോയി, എന്റെ ഗതകാലപ്രേമങ്ങൾ ഉള്ളിടത്തേക്ക് ഞാൻ തിരിച്ചുപോയി, എന്റെ ഹൃദയം നിറയെ പുതുപ്രണയത്തിന്റെ പ്രതാപമായിരുന്നു, എന്നാൽ, എന്റെ കണ്ണുകൾ പൊടുന്നനെ ഭയാകുലമായി.