La’lüñle Câm Yok Yire Eyler
B
Bakî
0
Altın Yaprak
La’lüñle câm yok yire eyler müdâm bahs
İzhâr-ı hak degülse garaz hod harâm bahs
Üstâd eline girmedi nâ-puhtedür henûz
Nâzük tenüñle eylemesün sîm-i hâm bahs
Gül goncasınuñ olmadı mesmû’ sözleri
La’lüñle gerçi eyledi mâ-lâ-kelâm bahs
Bülbül nevâ-yı nâleme kılmaz mu’âraza
Zîrâ götürmez ey yüzi gül her makâm bahs
Erbâb-ı ‘aşk ceng ider eshâb-ı zühd ile
Maksûd sensin eyleseler hâs u ‘âm bahs
Hüsnüñ katında togmaduga döndi her biri
Hûrşîd ü mâh eyler iken subh u şâm bahs
Bâkî ferîd-i fenn-i suhandur nizâ’ı ko
İlzâm iderler itme sakın iltizâm bahs
Kamu malı: şairin ölümünün üzerinden 70 yıldan fazla geçti.
Bu şiiri puanla
Henüz puan verilmemiş