Târîh-i Kasr

Âsaf-ı pâk-şiyem ya‘ni Receb Pâşâ kim ‘Âleme şahne-i tedbîri ile virdi nizâm Nice âsaf ki felek şâl-i şafakfâmından Râzı olsa ser-i zânûsına eyler ihrâm Nice âsaf ki siyâset-gerî-i ‘adlinden Beslenür ‘izzet ile lâne-i şâhinde hamâm Hˇ âbda olsa ‘atâsı o sadâkatkârun Dest-i sâyilde uyansa bulunur nakd-i menâm Rütbe-i kadrini gerdûn diyemem bî-pervâ Pâye-i rif‘atini derk idemez fehm-i ‘avâm İktizâ itmek ile ‘âdet-i hayr-endîşî Ki koya defter-i eyyâmda âsâr ile nâm İtdi peydâ yine bir kasr-ı ferah-efzâ kim Görmemiş mislini çeşm-i felek-i mînâfâm Reşk ider safvetine subh-ı sa‘âdet-pertev Yeridür revzenesine meh u hurşîd ola câm Sâha-i dil-keşi ol denlü neşât-efzâ kim Kalmaz âyîne-i hâtırda gubâr-ı âlâm Zâhir ü bâtını mahbûbdur ol mertebe kim Görinür sebze ile dilber-i nev-hatt leb-i bâm Rûy-ı maksûd-ı takayyüdle bakılsa görinür Oldı dîvâr u deri tâ o kadar âyînefâm Ferşi bilmem dil-i sengîn bütândandur kim Ugrasa bâd-ı sabâ hem ider aheste hırâm Sakfını sâha-i gülzâra iderdüm teşbîh Revnak-ı gülşeni de rûzda olsaydı devâm Kanda bu tarh-ı ‘aceb kanda nukûş-ı Mânî Hat-ı yâkûta berâber mi olur her hat-ı hâm Şu‘le hû yâr-ı sehî-kaddur ocâgı ki müdâm Nâz ile sohbete germiyyet içün itdi kıyâm Şeh-nişîn sîne girüp itse tefâhur yeridür Âmidün gögsidür envâ‘-ı şerefle bu makâm Göz deger olmaya bilmezlük ile nakkâşân Çekeler safha-i dîvârına nahl-i bâdâm Sa‘d olup çirk-i nuhûsetden olur tâli‘-i pâk Havzına baksa Zuhal bâm-ı felekden bir şâm Bu binâ böyle safâ-bahş u mülûkâne iken Âferîn dâver-i ‘âlî güher-i hayr-encâm Olmadın himmet-i ‘âlîsi haberdâr henûz Ham-ı ebrûsı işâretle anı itdi temâm Güft ü gûsuz bilür ahvâlini dâ‘ilerinün Ben ne hâcet ki huzûrunda idem ‘arz-ı merâm Kanda ben kanda senâ-güsterî-i âsaf-ı ‘ahd Kâ’ilem şehd-i du‘âsıyla olam şîrîn-kâm Bî-riyâ hayr du‘âdur ki suda‘ı olmaz Yeter Âgâh yeter eyleme tatvîl-i kelâm İde Hakk devlet-i dâreyn ile şâd u hurrem Hıdmetinde ola ikbâl-i kemer-beste gulâm Oldı bin şîve ile cilve-nümâ târîhi Hâne-i ‘adl ola dâ’im bu nev-îcâd makâm